चाळीसगाव (जळगाव) : शहरासह तालुक्यात सोमवारी रात्रीपासून मुसळधार पाऊस झाल्याने तालुक्यातील नदी- नाले फुलवून ओसंडून वाहत आहेत. शहरातून वाहणाऱ्या तितुर व डोंगरी नदीला पूर आला असून पुराचे पाणी शहराच्या दोन्ही भागांना जोडणाऱ्या पुलांवरून वाहत असल्याने दोन्ही बाजूचा संपर्क तुटला आहे. (jalgaon-news-Heavy-rain-there-was-no-communication-between-the-two-sides-of-Chalisgaon-city)

शहरासह ग्रामीण भागात पावसाचा जोर अधिक असल्याने शेतीचे मोठ्या प्रमाणावर नुकसान झाले आहे. तालुक्यातील पाटणादेवी, शिवापुर, मोठा महादेव, कन्हेरगड, परिसरात आज सकाळपासून मुसळधार पाऊस सुरू आहे. पाटणा गाव आणि परिसरात पाऊस सुरूच असल्याने नदीपात्रात अजून पाणी वाढण्याची शक्यता आहे. त्यामुळे नदीलगतच्या लोकांना सतर्क राहण्याचा इशारा प्रशासनाने दिला आहे.

बारा प्रकल्‍प ओव्‍हरफ्लो

गिरणा धरण परिसरातही चांगला पाऊस होत असल्याने धरणाचा जलसाठा ७८ टक्के झाला आहे. तालुक्यातील मन्याड धरण परिसरात ७५ मिमी पावसाची नोंद झाली असून सध्या या धरणातून पाच हजार क्युसेसचा विसर्ग सुरु आहे. तर जामदा (ता. चाळीसगाव) बंधा-यातून १५ हजार क्युसेसचा विसर्ग सुरू आहे. तालुक्यातील १४ पैकी १२ मध्यम जलप्रकल्प ओव्हर फ्लो झाले आहेत. बोरखेडा व देवळी- भोरस मध्यम प्रकल्प भरण्याच्या मार्गावर आहेत.

नदीला मोठ्या पुराची शक्‍यता

चाळीसगाव तालुक्यात गेल्या अनेक वर्षात प्रथमच विक्रमी पर्जन्यमान होत आहे. जूनपाणी व शिंदी (ता. चाळीसगाव) येथे ढगफुटी सदृश्य पाऊस झाल्यामुळे नदीला मोठा पूर येण्याची दाट शक्यता आहे.