जळगाव : जळगाव महापालिकेतून देण्यात आलेल्या ५० जन्म- मृत्यूच्या दाखल्याच्या प्रकरणातील ४३ दाखल्याच्या प्रकरणावर तहसीलदारांच्या बनावट सह्या असल्याचा धक्कादायक प्रकार समोर आला आहे. या प्रकाराने जळगावच्या प्रशासनात खळबळ उडाली असून या प्रकरणामुळे मागील तीन महिन्यातील प्रकरणांची चौकशी केली जाणार आहे. 

बनावट शिक्के, सही करून फसवणूक करण्याचे प्रकार समोर आले आहेत. अमरावतीमध्ये मंत्री चंद्रशेखर बावनकुळे यांचे बनावट लेटर हेड व बनावट सहीने जिल्हाधिकारी यांना पत्र दिल्याचा प्रकार कालच समोर आला होता. यानंतर आता जळगांवमध्ये तहसीलदारांच्या बनावट सहीने जन्म- मृत्यूचे दाखले दिल्याचा गंभीर प्रकार समोर आला आहे. यात जळगाव तहसीलदारांच्या सहीने तब्बल ४३ प्रकरणे तयार केल्याचा धक्कादायक प्रकार समोर आला आहे. 

तीन वर्षाचे रेकॉर्ड तपासणार 

जळगाव महापालिकेच्या जन्म- मृत्यू नोंदणी विभागात फेब्रुवारी महिन्यात अवघ्या दहा ते बारा दिवसांत ५० प्रकरणे दाखल झाली होती. त्यातील ४३ प्रकरणांवर तहसीलदारांच्या बनावट सह्या असल्याचे समोर आल्याने प्रचंड खळबळ उडाली आहे. यामुळे आता जळगावातील बोगस जन्मदाखल्यांच्या प्रकरणांची चौकशी सुरू करण्यात आली आहे. तर जळगाव महापालिकेतील या गंभीर प्रकारामुळे महापालिकेचा मागील तीन वर्षांचे रेकॉर्ड तपासण्याचा निर्णय घेण्यात आला आहे. 

मालेगावप्रमाणे बांगलादेशी कनेक्शन?

जळगाव तहसीलदारांच्या नावाने बनावट सह्या करणाऱ्या अज्ञात व्यक्तींविरुद्ध गुन्हा दाखल होणार करण्यात येणार आहे.  याप्रकरणी आता महापालिकेसह जळगाव तहसीलदार देखील गुन्हा दाखल करणार असल्याची माहिती जिल्हाधिकारी आयुष प्रसाद यांनी दिली आहे.  या संपूर्ण प्रकरणात मालेगाव प्रमाणे बांगलादेशी कनेक्शन असल्याची शक्यता वर्तविण्यात येत असल्यामुळे या संपूर्ण दाखल्यांची कसून तपासणी प्रशासनातर्फे सुरू करण्यात आली आहे.