जळगाव : कोरोना काळात बंद झालेली भुसावळ- मुंबई व देवळाली पॅसेंजरला आता पर्याय मिळालेला असून, गेल्या अनेक दिवसांच्या मागणीनंतर १० जानेवारीपासून भुसावळ- इगतपुरी दरम्यान मेमू ट्रेन (Memu Train) धावणार आहे. यामुळे अनेक प्रवाशांना दिलासा मिळणार आहे. (jalgaon-news-Bhusawal-Igatpuri-Memu-train-to-run-from-tomorrow)

कोरोना (Corona) काळात रेल्वे प्रशासनातर्फे पॅसेंजर गाड्या बंद करण्यात आल्या होत्या. यामुळे सर्वसामान्य जनतेचे हाल झाले होते. (Bhusawal) भुसावळ- जळगाव, चाळीसगाव, पाचोरा किंवा त्यापुढे थोड्या अंतराचा प्रवास करण्यासाठी एक्सप्रेस गाडीचेच तिकीट काढावे लागत होते. यामुळे नाइलाजाने खिशाला कात्री लागत होती. तसेच तिकीटही वेटिंग मिळत होते. मात्र आता अप- डाऊन करणाऱ्यासह गावोगावी पॅसेंजर गाडीचा सहारा घेऊन उद्योग व्यवसाय करणाऱ्यांना मोठा दिलासा मिळाला असून, येत्या १० जानेवारी सोमवारपासून भुसावळ- इगतपुरी (Bhusawal Igatpuri Train) मेमू ट्रेन धावणार आहे. यामुळे या मार्गावरील प्रवाशांचा प्रवास कमी वेळेत सुखकर होणार आहे.

या क्रमांकाने धावणार मेमू ट्रेन

गाडी क्रमांक ११११९/२० या क्रमांकाने भुसावळ-इगतपुरी मेमू ट्रेन धावणार असून भुसावळ रेल्वे स्थानकावरून ही गाडी सकाळी ७ वाजता सुटेल व परतीच्या प्रवासात इगतपुरी येथून सकाळी ९ : ५५ मिनिटांनी भुसावळसाठी सुटेल.

पॅसेंजर गाड्या होतील इतिहासजमा

भुसावळ जंक्शन येथून भुसावळ- मुंबई, भुसावळ- देवळाली, भुसावळ- बडनेरा, भुसावळ- वर्धा, भुसावळ- कटणी, भुसावळ- पुणे असे पॅसेंजर गाड्या सुरु होत्या. मात्र कोरोना काळापासून हळूहळू पॅसेंजर गाड्या इतिहासजमा होत असून त्याऐवजी रेल्वे प्रशासनातर्फे मेमू गाड्या सुरु करण्यात येत आहे. भुसावळ रेल्वे स्थानकावरून भुसावळ- बडनेरा, भुसावळ -इटारसी, भुसावळ- दौंड दरम्यान मेमूच्या स्वरूपात गाड्या सुरू करण्यात आले असून आता इगतपुरीसाठी मेमू गाडी धावणार आहे.