जळगाव : "अरे संसार संसार, जसा तवा चुल्ह्यावर, आधी हाताला चटके, तवा मियते भाकर..’ बहिणाबाईंच्या या कवितेच्या जीवन विषयक आशय मुल्यांना चक्क तव्यावर तेही बहिणाबाईंच्या प्रतिमेसह आकर्षक रंगात चित्रित केले आहे. निमित्‍त राहिले ते कवयित्री बहिणाबाई चौधरी यांच्या जयंतीच्या औचित्याचे. (jalgaon-news-Bahinabai's-poem-Are-Sansar-Sansar-is-painted-on-a-beautiful-tawa)

मानवसेवा विद्यालय जळगाव शाळेचे चित्रकार सुनील दाभाडे यांनी जळगावच्या माहेरवासीन असलेल्‍या सुप्रसिद्ध कवयित्री बहिणाबाई चौधरी यांच्या जयंतीच्या औचित्याने बहिणाबाईंची गाजलेली कविता तव्‍यावर उतरविली. बहिणाबाईंची कविता प्रकाशित झाल्यानंतर आजतागायत अनेक कलावंतांनी त्यांच्या कवितांवर इल्युस्ट्रेशन कागदावर, कॅनव्हासवर केले आहे. परंतु चक्क तव्यावर ही कविता अभिनव पद्धतीने चित्रित करून दाभाडे यांनी कवितेचा हा कलात्मक सत्कारच केला आहे. त्यामुळे बहिणाबाई चौधरी परमानंदाने स्वर्गात आत्मतृप्त होतील. अवलिया चित्रकार दाभाडे यांच्या अतर्क्य, अतुलनीय कलाप्रवासात नेहमी मानवसेवा मंडळ संचलित प्राथमिक व माध्यमिक विद्यालयाचे अध्यक्ष डॉ. आर. एस. डाकलीया सर्व पदाधिकारी, प्राथमिक मुख्याध्यापिका माया आंबटकर, माध्यमिक मुख्याध्यापिका प्रतिभा सूर्यवंशी, बालवाडी मुख्याध्यापिका मुक्ता पाटील, शिक्षक वृंद यांच्‍यासह अनेकांचे सहकार्य लाभत आहे.

दाभाडेंनी भाकरीवर काढले बाबासाहेब..

चित्रकार सुनिल न्हानू दाभाडे यांनी यापूर्वी अतिशय कल्पकतेने प्रज्ञासूर्य भारतरत्न डॉ. बाबासाहेब आंबेडकर यांचे चित्र ज्वारीच्या भाकरीवर काढले होते. ही पोस्ट अल्पावधीत प्रचंड व्हायरल झाली. याची दखल ओएमजी बुक ऑफ रेकॉर्ड संस्थेने जगातली पहिली ज्वारीच्या भाकरीवरील बाबासाहेबांची पेंटिंग म्हणून नोंद घेत दाभाडेंचा गौरव केला.