अमळनेर (जळगाव) : उन्हाची तीव्रता वाढण्यासोबतच पाणीटंचाईचे सावट गडद होत चालले आहे. मार्च महिन्यातच पाण्यासाठी भटकंती करण्याची वेळ आली आहे. यात आता जळगाव जिल्ह्यातील अमळनेर तालुक्यातील अनेक गावांमध्ये देखील तीव्र पाणीटंचाई जाणवू लागली आहे. त्यामुळे अनेक गावांतील ग्रामस्थांना आपली तहान भागविण्यासाठी आतापासूनच भटकंती करावी लागत आहे.

जळगाव जिल्ह्यात उन्हाची तीव्रता वाढली आहे. यामुळे जलसाठ्यांमध्ये मोठ्या प्रमाणात घट निर्माण होत असल्याचे पाहण्यास मिळत आहे. त्यानुसार जळगावच्या अमळनेर तालुक्यातील अनेक गावांमध्ये विहिरींची जल पातळी खालावली आहे. तर काही गावांमधील विहिरी पूर्णपणे कोरड्या पडलेल्या आहेत. त्यामुळे पिण्याच्या पाण्यासह जनावरांच्या पाण्याचाही गंभीर प्रश्न निर्माण झाला आहे. यामुळे पाण्याची तहान भागविण्यासाठी नागरिकांना दूरवर जावे लागत आहे. 

पाणी योजना होऊनही उपयोग नाही 

तालुक्यातील डांगर गावाला मुख्यमंत्री पेयजल योजनेतून पाणीपुरवठा योजना मंजूर आहे. शिरडाणे (ता.धुळे) येथून पांझरा नदीच्या काठावरील विहिरीवरून पाणीपुरवठा होत होता. मात्र विहिरीतील पाणी पातळी कमी झाल्याने टंचाई जाणवू लागली आहे. अमळनेर तालुक्यातील अनेक गावांमध्ये तीव्र टंचाई जाणवू लागली आहे. काही गावांना पाणीपुरवठा योजना मंजूर आहेत. मात्र, निव्वळ वीजजोडणी मिळत नसल्याने पाणीपुरवठा सुरू होत नाही. नगाव बुद्रुक येथेदेखील तीव्र पाणीटंचाई जाणवू लागली आहे. 

ट्रॅकरची मागणी 

पाणी टंचाईमुळे शेतकरी व ग्रामीण भागातील नागरिक चिंतेत आहेत. आगामी काळात पाण्याची समस्या अधिक गडद होण्याचे चित्र आहे. यामुळे प्रशासनाने तातडीने उपाययोजना कराव्यात, अशी मागणी तालुक्यातून जोर धरू लागली आहे. तसेच ट्रॅकरद्वारे पाणी पुरवठा करण्यात यावा. तसेच पांझरा नदीत आवर्तन सोडल्यास पाणीटंचाईचा प्रश्न सुटणार असल्याची मागणी होऊ लागली आहे.