जळगाव : विधानसभा निवडणुकीत प्रचाराच्या तोफा धडाडत असताना बोदवड- मुक्ताईनगर मतदारसंघात अपक्ष उमेदवारावर प्रचारादरम्यान गोळीबार झाल्याची घटना काल (५ नोव्हेंबर) घडली होती. या प्रकरणी दाखल तक्रारीवरून पोलिसांनी तपास करत एका जनाला ताब्यात घेतले आहे. मात्र अन्य दोघे अजूनही फरार आहेत. 

जळगाव (Jalgaon) जिल्ह्यातील बोदवड- मुक्ताईनगर मतदारसंघाच्या निवडणूकीसाठी अपक्ष उमेदवार विनोद सोनवणे हे निवडणूकीच्या रिंगणात उभे आहेत. त्यांनी मतदारसंघात प्रचाराचा शुभारंभ केल्यानंतर त्यांची प्रचार फेरी सुरू असतांना दुचाकीवर असलेल्या तिघांनी त्यांच्यावर गोळीबार केला. त्यानंतर हल्लेखोर हे पसार झाले होते. याप्रकरणी (Bodwad) बोदवड पोलीस ठाण्यात गुन्हा दाखल करण्यात आला होता. बोदवड आणि मुक्ताईनगर पोलीसांनी गोपनिय माहितीच्या आधारे अवघ्या बारा तासात गुन्ह्याचा छडा लावला आहे. 

गोळीबार झालेल्या प्रकरणात पोलीसांनी तपास करत एका हल्लेखोराला शिताफीने अटक केली आहे. त्यांच्याकडून गावठी पिस्तूल आणि एक जिवंत काडतूस जप्त करण्यात आले आहे. मात्र सदर प्रकरणातील दोन संशयित अद्याप फार झाले असल्याची माहिती समोर आली आहे. त्यांचा देखील शोध पोलीस घेत आहेत.