जळगाव : दोन दिवसांपूर्वीच वडिलांनी सुसाईड नोट लिहून आत्महत्या केली होती. काल खान्देशचा रीलस्टर विक्की पाटील याचा संशयास्पद मृत्यू झाला आहे. एका जागी कुजलेल्या अवस्थेत त्याचा मृतदेह आढळून आल्याने एरंडोल परिसरात एकच खळबळ उडाली आहे. मात्र, या घटनेला धक्कादायक वळण लागण्याची दाट शक्यता असल्याचं बोललं जात आहे. पोलिसांनी याबाबत अजून काही माहिती दिलेली नाहीय. पण विक्की पाटील यांच्या चाहत्यांनी त्या आशयाचे स्टेट्‍स ठेवल्याचं समोर येत आहे.

विक्की पाटील यांला त्याच्या वडिलांनी नाही मारलंय. अशा खोट्या बातम्या पसरवू नका. विक्की पाटील आणि त्याच्या वडिलांची हत्या विक्कीच्या काकांनी केली असल्याची एका चाहत्यानं आपल्या इन्स्ट्राग्रामला स्टोरी ठेवलेली आहे. त्यामुळे या घटनेला वेगळं वळण लागण्याची दाट शक्यता वर्तवण्यात येत आहेत.

नेमकी घटना काय?

ही घटना धरणगाव तालुक्यातील असून रीलस्टार असलेल्या एका तरुणाचा मृतदेह आढळून आल्याची धक्कादायक बाब काल गुरुवारी २६ फेब्रुवारी रोजी दुपारी २ वाजेच्या सुमारास उघडकीस आली आहे. विशेष म्हणजे त्याच्या वडिलांनी दोन दिवसांपूर्वी सुसाईड नोट लिहून आत्महत्या केली होती. या घटनेमुळे धरणगाव तालुका हादरला आहे. विकी उर्फ हितेश विठ्ठल पाटील (वय २२ रा. भोरखेडा तालुका धरणगाव हल्ली मुक्काम एरंडोल) असं मयत झालेल्या रीलस्टार तरुणाचं नाव आहे.