जळगाव : राज्य परिवहन महामंडळाच्या बसला अपघात झाला आहे. लाडली गावात मुक्कामी असलेली बस शाळेत जाणाऱ्या विद्यार्थाना घेऊन मार्गस्थ झाल्यानंतर चालकाचे नियंत्रण सुटल्याने बसला अपघात झाला. विद्युत पोलला बस धडकून नाल्यात गेली. सुदैवाने मोठा अनर्थ टळला आहे. मात्र अपघात झाल्यानंतर प्रवाशी व विद्यार्थी घाबरल्याने आरडाओरड केली होती. 

धरणगाव तालुक्यातील लाडली येथे मुक्कामी असलेल्या बसला पहाटे साडेसहा वाजेच्या सुमारास अपघात झाला. या बसमध्ये रोज अपडाऊन करणारे विद्यार्थी जात असतात. लाडली गावात मुक्कामी असलेली बस नेहमीप्रमाणे आज लाडली येथून सकाळी सहाला शाळकरी व महाविद्यालयीन विद्यार्थ्यांना घेऊन मार्गस्थ झाली होती. पुढे रेल गावातील विद्यार्थ्यांना घेऊन पाळधीकडे येत असताना दोनगाव जवळील वळणाजवळ हा अपघात झाला.  

चालकाचा ताबा सुटल्याने अपघात 

दरम्यान रेल येथून बस मार्गस्थ झाल्यानंतर दोनगाव जवळ आल्यानंतर येथे असलेल्या वळण रस्त्यावर बस चालकाचा बसवरील ताबा सुटल्याने बस वळणावरील जवळील इलेक्ट्रिक खांब्याला धडकली. यानंतर बस थेट नाल्यात गेली. पण सुदैवाने इलेक्ट्रिक खांब्याला बस धडकल्यानंतर काही मोठा अपघात न झाल्याने पुढील दुर्घटना टळली आहे. या अपघातात काही प्रवासी किरकोळ जखमी झाले आहेत.

विद्यार्थ्यांची आरडाओरड 

बस अनियंत्रित होऊन बस थेट वळणावर असलेल्या इलेक्ट्रिक खांद्यावर धडकल्याने पुढील अनर्थ टळला आहे. मात्र बसने खांबाला धडक देत थेट नाल्यात गेल्याने विद्यार्थी व प्रवासी घाबरले होते. विद्यार्थ्यांनी यावेळी आरडाओरड केल्याने प्रचंड गोंधळ निर्माण झाला होता. अपघात घडल्यानंतर दोनगाव येथील ग्रामस्थ लागलीच धावून आले. यानंतर त्यांनी सर्व विद्यार्थ्यांना बाहेर काढले. तसेच लाडली व रेल येथील पालक व ग्रामस्थ देखील घटनास्थळी दाखल झाले होते.