जळगाव : सायबर गुन्हेगारीचे प्रमाण वाढत चालले आहे. आमिष देत फसवणूक करण्याचे प्रकार वाढत असताना भारतीय सैन्य दलात कार्यरत जवानाला गंडा घालण्यात आला आहे. या जवानाचा मोबाईल हॅक करून घेत सुरवातीला ऑनलाईन कर्ज मंजूर करून घेतले. त्यानंतर खात्यातून ८ लाख रुपयांची रक्कम परस्पर वेगवेगळ्या खात्यात वर्ग करून घेण्याचा प्रकार घडला आहे. या प्रकरणी सायबर पोलिसात गुन्हा दाखल करण्यात आला आहे.  

चाळीसगाव येथील विजय चिंधा राजपूत असे फसवणूक झालेल्या सैनिकाचे नाव आहे. सायबर गुन्हेगारांकडून वेगवेगळ्या पद्धतीने फसवणूक करत गंडा घातला जात आहे. मागील काही वर्षांमध्ये हे प्रमाण वाढत चालले आहे. आमिष दाखवत तसेच काहीतरी गिफ्ट देण्याच्या बहाण्याने गंडा घातला जात आहे. अशातच चाळीसगाव येथील भारतीय सैन्य दलात कार्यरत जवानांची फसवणूक करण्यात आल्याचे समोर आले आहे.  

कर्जाबाबत केली विचारणा 

चाळीसगाव येथील विजय राजपूत हे भारतीय सैन्य दलात शिपाई म्हणून नोकरीला असून त्यांची जम्मू येथील रामबण येथे नियुक्ती आहे. दरम्यान जून महिन्यात त्यांच्याशी एका अनोळखी व्यक्तीने संपर्क साधून ७ लाख ४३ हजार रुपयांचे कर्ज हवे असल्याची विचारणा केली. मात्र विजय राजपूत यांनी त्यास नकार दिला. त्यानंतर मात्र १ जुलै रोजी त्यांना त्यांच्या चाळीसगाव येथील स्टेट बँकेत असलेल्या खात्यातून १३ हजार १३६ रुपये डेबिट झाल्याचा मेसेज आला.

ऑनलाईन कर्ज काढत रक्कम काढली 

हा प्रकार घडल्यानंतर सायबर गुन्हेगाराने विजय राजपूत यांच्या मोबाइलचा ताबा घेतला. यानंतर परस्पर राजपूत यांच्या नावे सात लाख ४३ हजार रुपये ऑनलाइन कर्ज मंजूर करून घेतले. हि सर्व रक्कम सायबर गुन्हेगाराने आपल्या वेगवेगळ्या खात्यात वळती केली. हा प्रकार लक्षात आल्यानंतर राजपुरी यांनी या प्रकरणी सायबर पोलिस ठाण्यात गुन्हा दाखल केला असून पोलिसांकडून तपास सुरू आहे.