जळगाव : जळगाव जिल्हा पुन्हा एकदा खुनाच्या घटनेने हादरला आहे. रात्री हॉटेलात मित्रांसोबत जेवणासाठी गेलेल्या तरुणावर जुन्या वादातून शस्त्राने हल्ला चढविला. यात तरुणाचा मृत्यू झाल्याची घटना एका हॉटेलात घडली. या प्रकरणी शनिपेठ पोलिसात गुन्हा दाखल करण्यात आला आहे. 

जळगाव शहरातील कालिंका माता मंदिर परिसरातील एका हॉटेलात रात्री अकरा वाजेच्या सुमारास हि घटना घडली आहे. किशोर सोनवणे असे मृत झालेल्या तरुणाचे नाव आहे. किशोर व त्याचा मित्र अमोल सोनार हे जेवणासाठी एका हॉटेलमध्ये बसले होते. दरम्यान रात्री अकराच्या सुमारास चार ते पाच तरुणांनी दोघांवर शस्त्राने हल्ला केला. यात किशोर सोनवणेचा जागीच मृत्यू झाला. तर अमोल सोनार गंभीर जखमी आहे. 

सदर घटनेची माहिती मिळाल्यावर शनिपेठ पोलिसांचे पथक घटनास्थळी दाखल झाले. पंचनामा करून मृतदेह जिल्हा सामान्य रुग्णालयात रवाना केला. तर मारेकऱ्यांमधील एकास स्थानिक गुन्हे शाखेच्या पथकाने ताब्यात घेतले असून, त्यांना शनिपेठ पोलिस ठाण्यात आणले होते. या प्रकरणी गुन्हा दाखल झाला आहे.