जळगाव : सायबर गुन्हेगारीचे प्रमाण दिवसेंदिवस वाढत चालले आहे. फसवणुकीच्या घटना समोर येत असताना देखील अमिषाला बळी पडत आहे. अशीच घटना जळगावमध्ये समोर आली असून कंपनीत गुंतवणूक केल्यास अधिक नफा मिळवून देण्याचे आमिष दाखवत एका सेवानिवृत्त एसटी कर्मचाऱ्याला गंडविण्यात आले आहे. या प्रकरणात साडेपाच लाख रुपयात फसवणूक केल्याचे समोर आले आहे. 

जळगावच्या अमळनेर शहरातील निवृत्त एसटी कर्मचारी प्रकाश जानकीराम बडगुजर (वय ७९) यांना पाच लाख ६० हजार रुपयांत सायबर गुन्हेगारांकडून ऑनलाइन फसवणूक करण्यात आली आहे. प्रकाश बडगुजर यांच्याशी १ मेस रिधी वर्मा नावाच्या तरुणीने व्हॉट्सॲपवरून संपर्क साधला. नंतर आकाश सिंग याने संपर्क करून एका कंपनीत गुंतवणूक करण्यास सांगितले. त्यांना जास्तीचा नफा मिळवून देण्याचे आमिष दाखविले. 

१८ लाखाचा नफा झाल्याचे दाखविले 

बडगुजर यांना गुंतवणूक केल्यास त्यावर अधिकचा नफा होईल, असे सांगून विश्वासात घेतले. यावर विश्वास ठेवत प्रकाश बडगुजर यांनी काही रक्कम गुंतवणूक केली. या गुंतविलेल्या रकमेवर १८ लाख ८५ हजार रुपयांचा नफा झाल्याचे समोरच्यांनी बडगुजर यांना एका ॲपच्या माध्यमातून दाखविले. यामुळे बडगुजर यांचा विश्वास पक्का झाला. यामुळे त्यांनी आणखी रक्कम गुंतविण्याचे सांगितले. 

नफा अन्‌ रक्कमही गेली
दरम्यान नफा मिळत असल्याच्या आमिषातुन बडगुजर यांनी पाच लाख ६० हजार रुपये कंपनीत गुंतविले. मात्र, पैसे काढण्याचा प्रयत्न केला असता पैसे काढता येत नव्हते. त्यामुळे फसवणूक झाल्याचे बडगुजर यांच्या लक्षात आले. यानंतर त्यांनी सायबर पोलिसांत ऑनलाइन ठगांविरुद्ध गुन्हा दाखल झाला आहे. या प्रकरणी पोलिस निरीक्षक सतीश गोराडे तपास करीत आहेत.