चाळीसगाव (जळगाव) : घरातील सर्व सदस्य कामाला गेले होते. यावेळी घरी बहीण आणि भाऊच होते. यातच भाऊ घराबाहेर गेल्याने तरुणी घरी एकटीच होती. यामुळे ती घराचा दरवाजा बंद करण्यासाठी गेली असता तिच्यासोबत दुर्दैवी घटना घडली. या घटनेत तरुणीचा मृत्यू झाला असून कामावरून घरी आलेल्या कुटुंबियांना मोठा धक्का बसला असनू या प्रकरणी चाळीसगाव ग्रामीण पोलीस स्टेशनला नोंद करण्यात आली आहे.

चाळीसगाव तालुक्यातील हातले तांडा येथील धनश्री साईनाथ राठोड (वय १७) असे मयत तरुणीचे नाव आहे. धनश्रीचे वडील साईनाथ काशिनाथ राठोड हे हातमजुरी करून परिवाराचा उदरनिर्वाह करतात. तिला दोन भाऊ आहेत. दरम्यान २५ जूनला सकाळी कुटुंबातील सर्व सदस्य नेहमीप्रमाणे कामावर निघून गेले. यावेळी धनश्री आणि तिचा भाऊ असे दोघेजण घरी होते. थोड्या वेळाने तिचा भाऊ देखील बाहेर गेला असता धनश्री दरवाजाला कडी लावायला गेली. 

दरवाजा बंद करताना बसला विजेचा झटका 

दरवाजाची कडी लावत असताना दरवाजात विद्युत प्रवाह उतरलेला असल्याने तिला जोरदार झटका बसला. यात धनश्री दूरवर फेकली गेली. दरम्यान, मीटरची वायर कट झाल्यामुळे हा विद्युत प्रवाह उतरला होता अशी माहिती नातेवाईकांकडून मिळाली. घटनेची माहिती मिळताच कुटुंबीय घरी आले. यानंतर त्यांनी धनश्रीला चाळीसगाव ग्रामीण रुग्णालयात उपचारासाठी दाखल केले असता तिला वैद्यकीय अधिकाऱ्यांनी तपासून मयत घोषित केले. 

दोन भावांची लाडाची बहीण 

धनश्री हि दोन भावांची एकटीच बहीण होती. तिच्या मृत्यूच्या बातमीने कुटुंबीयांनी एकच आक्रोश केला. हात मजुरी करणाऱ्या कुटुंबावर कोसळलेल्या दुःखद घटनेमुळे हातले तांडा गावावर शोककळा पसरली आहे. घटनेप्रकरणी चाळीसगाव ग्रामीण पोलीस स्टेशनला अकस्मात मृत्यूची नोंद करण्यात आली आहे.