मेहुणबारे (जळगाव) : दोन मित्र दुचाकीने जात असताना मागून आलेल्या भरधाव ट्रकने दुचाकीला जोरदार धडक दिली. यात दुचाकीवरील दोघांचा मृत्यू झाल्याची घटना घडली. हा अपघात चाळीसगाव- धुळे महामार्गावरील भोरस गायरान शिवारात घडला. 

चाळीसगाव (Chalisgaon) तालुक्यातील चिंचगव्हाण येथील विलास छगन बागूल (वय ४४) व अंकुश काशिनाथ गायकवाड (वय ३५) या दोघांचा घटनेत मृत्यू झाला आहे. विलास बागुल हा मित्राला घेऊन तळोंदे प्र. चा. सांगवी (ता. चाळीसगाव) येथे सासरवाडीला जाण्यासाठी दुचाकीने निघाले होते. यावेळी भोरस गायरान शिवाराजवळ त्यांच्या मागून भरधाव वेगाने येणाऱ्या ट्रकने जोरदार (Accident) धडक दिली. 

धडक इतकी जोरात होती, की दुचाकीवरील विलास बागूल व अंकुश गायकवाड हे दूरवर फेकले जाऊन यांना जबर मार लागल्याने दोघांचाही जागीच (Death) मृत्यू झाला. अपघात होताच ट्रक चालक पळून गेला. याप्रकरणी मुरलीधर बागूल यांनी दिलेल्या फिर्यादीवरून चालकाविरोधात चाळीसगाव ग्रामीण पोलिस ठाण्यात अपघाताचा गुन्हा दाखल झाला आहे. हवालदार विजय शिंदे तपास करीत आहेत.