भुसावळ (जळगाव) : आरपीएफ बँरेकमध्ये फुटबॉल कोचिंग करून झाल्यानंतर तेथील स्वीच बंद करायला गेले. यावेळी त्यांना विजेचा जोरदार झटका बसला. यात फुटबॉल कोचचा जागीच मृत्यू झाल्याची घटना भुसावळमध्ये घडली. 

भुसावळ (Bhusawal) शहरातील रेल्वे नॉर्थ कॉलनीतील सिद्धार्थ अनिल पवार (वय ३५) असे सदरच्या घटनेत मृत झालेल्या व्यक्तीचे नाव आहे. सदरची घटना १६ ऑक्टोम्बरला सायंकाळी सहाच्या सुमारास घडली. सिद्धार्थ पवार हे आरपीएफ बँरेकमध्ये फुटबॉल कोचिंग करीत होते. नेहमीप्रमाणे बुधवारी कोचिंग केल्यानंतर ते जाण्यासाठी निघाले होते. यावेळी त्यांनी तेथील स्वीच ऑफ करण्यास गेले असता, त्यांना विजेचा जोरदार धक्का (Electric Shock) लागला. 

यानंतर तेथे उपस्थित असलेल्यांनी त्यांना खासगी रुग्णालयात नेले असता, तेथे डॉक्टरांनी तपासून त्यांना मृत घोषित केले. याबाबत दिलीप किशन पवार (वय ५९) यांनी दिलेल्या माहितीवरून भुसावळ शहर पोलिस ठाण्यात आकस्मिक मृत्यूची नोंद झाली आहे. पोलिस नाईक रज्जा खान तपास करीत आहेत. मृत सिद्धार्थ पवार यांच्या मागे आई, भाऊ व बहीण असा परिवार आहे.