भरत मोहळकर, साम टीव्ही, प्रतिनिधी

लोकसभेतील यशानंतर काँग्रेसने विधानसभेसाठी 288 जागांचा सर्व्हे केलाय. या पहिल्याच सर्व्हेत काँग्रेस 75 जागांवर विजयी होण्याचा अंदाज वर्तवण्यात आलाय. तर या सर्व्हेत काँग्रेसला अच्छे दिन येण्याचा अंदाज वर्तवण्यात आलाय. त्यामुळे राज्यात मुख्यमंत्रिपद मिळवण्यासाठी काँग्रेसनं जोरदार तयारी सुरू केल्याचं दिसतंय.

मविआला बहुमत, काँग्रेसचा मुख्यमंत्री?

काँग्रेसकडून मुख्यमंत्रिपदाची तयारी सुरू असल्याची माहिती मिळत आहे. काँग्रेसकडून राज्यातील 288 मतदारसंघात सर्व्हे करण्यात आला आहे. सर्व्हेत विधानसभेला काँग्रेसला 'अच्छे दिन' येणार असल्याचं दिसतंय. काँग्रेसचे 75 आमदार निवडून येणार असल्याचा अंदाज या सर्व्हेत वर्तवण्यात आला आहे. दुसऱ्या सर्व्हेत कोणता उमेदवार निवडून येणार? याचा अभ्यास केला जाणार आहे.

काँग्रेसने जागांची चाचपणी केली असली तरी आम्ही महाविकास आघाडी म्हणूनच लढणार आहोत. मात्र आता पहिल्या सर्व्हेनंतर आम्ही उमेदवार निश्चित करण्यासाठी दुसऱा सर्व्हे करणार असल्याचं नाना पटोलेंनी स्पष्ट केलंय.

लोकसभेत काँग्रेसनं सर्वाधिक जागा जिंकल्या. त्यामुळे काँग्रेसचा आत्मविश्वास दुणावलाय. मात्र विधानसभेत मविआतल्या जागावाटपात काँग्रेसला हव्या त्या जागा मिळवण्यात यश आलं आणि ऐन निवडणुकीच्या काळात एकमेकांना अडचणीत आणणा-या सर्व ज्येष्ठ नेत्यांनी एकदिलानं काम केलं तरच काँग्रेसला यशाची पुनरावृत्ती करता येईल...