बालाजी सुरवसे, साम टीव्ही, प्रतिनिधी

धाराशिव : तुळजापूरजवळील प्रसिद्ध हॉटेल भाग्यश्रीच्या मालकाला अज्ञात व्यक्तीकडून जीवे मारण्याची धमकी देण्यात आली आहे. 'तुझे दिवस भरलेत, व्हिडीओ टाकू नकोस' असे म्हणत अज्ञात व्यक्तीने फोन करुन हॉटेल भाग्यश्रीचे मालक नागेश मडके यांना धमकावण्यात आले आहे. या प्रकरणामुळे भाग्यश्री हॉटेल चर्चेत आले आहे.

सोशल मीडियावर धुमाकूळ घालणाऱ्या हॉटेल भाग्यश्रीचे मालक नागेश मडके यांना अज्ञात व्यक्तीने फोन करुन जीवे मारण्याची धमकी दिली आहे. सोशल मीडियावर व्हिडीओ टाकू नकोस, आम्हाला तुला जीवे मारण्याची सुपारी मिळाली आहे. तुझे दिवस भरत आले आहेत, असे अज्ञातांनी नागेश मडके यांना फोनवर म्हटल्याची माहिती समोर आली आहे.

काही दिवसांपूर्वी हॉटेल भाग्यश्रीबाहेर हाणामारी झाली होती. काही कारणांवरुन हॉटेलमधील कामगार आणि तरुणांमध्ये वाद झाला होता. या वादाचे रुपांतर हाणामारीत झाले होते. मारहाणीचा थरारक व्हिडीओ सोशल मीडियावल व्हायरल झाला होता. यानंतर नागेश मडके यांनी सुरक्षेसाठी पुण्याहून बॉडीगार्ड्स बोलावले होते.

मारहाणीच्या प्रकरणानंतर नागेश मडके यांनी 'आमच्या हॉटेलचे नाव होत आहे. मुलीला वाढदिवसाला फॉच्युनर एसयुव्ही कार भेट दिल्यानंतर हॉटेल राज्यभर चर्चेत आले. पण ही गोष्ट काही लोकांना बघवत नाही. त्यामुळे आसपासच्या परिसरातील काहीलोक मुद्दामून येथे गोंधळ घालतात. भांडण उकरुन काढतात. आमच्या हॉटेलची बदनामी व्हावी, ग्राहकांची दिशाभूल करण्याचा प्रयत्न सुरु आहेत, असे म्हटले होते.