हिंगोलीतून एक भीषण अपघाताची बातमी समोर येत आहे. वसमत तालुक्यातील टोकाई ते कोठारी रस्त्यावर गुरुवारी सकाळी झालेल्या भीषण अपघातात दोन जण जागीच ठार, तर सहा जण गंभीर जखमी झाले आहेत. मृतांमध्ये दोन वर्षांच्या चिमुकल्याचाही समावेश असल्याने परिसरात हळहळ व्यक्त केली जात आहे. या प्रकरणाचा अधिक तपास सुरू आहे.

प्राथमिक माहितीनुसार, टोकाई पाटीजवळ रस्त्यावर बंद अवस्थेत उभ्या असलेल्या डंपरला भरधाव वेगाने येणाऱ्या कारने जोरदार धडक दिली. या भीषण अपघातात कारचे मोठ्या प्रमाणावर नुकसान झाले. या भीषण अपघातात दोन जण जागीच ठार, तर सहा जण गंभीर जखमी झाले असल्याची माहिती समोर आली आहे.

तसेच मृतांमध्ये दोन वर्षांच्या चिमुकल्याचाही समावेश असल्याची माहिती आहे. अपघाताची माहिती मिळताच पोलिसांनी तातडीने घटनास्थळी धाव घेत जखमींना तातडीने रुग्णालयात हलवले. सध्या जखमींवर रूग्णालयात उपचार सुरू आहेत. या दुर्घटनेमुळे पुन्हा एकदा राज्य व राष्ट्रीय महामार्गांवर रिफ्लेक्टर किंवा रेडियमशिवाय उभ्या असलेल्या वाहनांमुळे होणाऱ्या अपघातांचा मुद्दा ऐरणीवर आला आहे.

अनेक वाहनधारकांनी प्रशासनाकडे यावर ठोस उपाययोजना करण्याची मागणी केली आहे. सध्या या प्रकरणाचा पोलिसांकडून अधिक तपास सुरू असून जखमींची प्रकृती गंभीर असल्याने मृतांच्या संख्येत वाढ होण्याची शक्यता वर्तवली जात आहे. या घटनेनंतर परिसरात शोक व्यक्त केला जात आहे.