हिंगोली : हिंगोलीच्या वसमत तालुक्यात महसूल प्रशासनातील तलाठ्याचा पोटात व छातीत चाकूने वार करून खून करण्यात आल्याची घटना २८ ऑगस्टला दुपारी घडली होती. चुकीची माहिती मिळाल्याने तलाठ्याच्या खून केल्याचा धक्कादायक खुलासा पोलीस तपासात समोर आला आहे. 

संतोष पवार असे खून झालेल्या या तलाठ्याचे नाव असून आता या खून प्रकरणात (Police) पोलिसांनी आरोपी प्रताप कराळे याच्या विरोधात खुनाचा गुन्हा दाखल करून अटक केली आहे. दरम्यान पोलिसांच्या तपासात धक्कादायक माहिती समोर आली असून खून करणाऱ्या (Hingoli) आरोपीला तलाठी परस्पर जमीन त्याच्या काकाच्या नावावर करून देत असल्याची खोटी माहिती मिळाली होती. या माहितीची कोणतीही खात्री न करता प्रताप कराळे याने तलाठी शासकीय कामकाज करत असताना अचानक कार्यालयात येऊन डोळ्यात मिरची पूड टाकत खून केला आहे. 

विशेष म्हणजे कोणतंही शासकीय कामकाज प्रलंबित नसताना केवळ गैरसमजतीतून एका तलाठ्याचा बळी गेल्याने आता तलाठी संघटना आक्रमक झाली आहे. या विरोधात आज राज्यभर महसूल प्रशासनाच्या वतीने आंदोलन सुरू करण्यात आले आहे. दरम्यान नाहक तलाठ्याचा बळी घेणाऱ्या आरोपीला कठोर शिक्षा द्या; अशी मागणी महसूल अधिकारी कर्मचारी करत आहेत.