हिंगोली : रात्रीच्या सुमारास दोघे मित्र हॉटेलमध्ये जेवणासाठी गेले होते. हॉटेलमध्ये टेबलावर बसले असताना तीन जणांनी जीवघेणा हल्ला करत चाकूने वार केले. यामध्ये एकाच जागीच मृत्यू झाला. तर दुसरा मित्र गंभीर जखमी झाला आहे. सदरची घटना वसमत तालुक्यात घडली असून घटनेने परिसरात एकच खळबळ उडाली आहे. दरम्यान घटनेचा तपास पोलिसांकडून करण्यात येत आहे. 

हिंगोलीच्या वसमत तालुक्यातील हयातनगर फाटा याठिकाणी रात्री अकरा वाजेच्या सुमारास सदरची घटना घडली आहे. या घटनेत विशाल देवरे (वय २२) असे मृत झालेल्या तरुणाचे नाव आहे. तर ओमकार नरवाडे हा तरुण गंभीर जखमी आहे. दरम्यान विशाल आणि ओमकार हे दोघेजण रात्रीच्या सुमारास हयातनगर फाटा येथे एका हॉटेलवर जेवणासाठी गेले होते. ते दोघे टेबलावर बसले असतानाच हि घटना घडली. 

तिघांनी केला जीवघेणा हल्ला 

हॉटेलमध्ये बसले असताना विशाल आणि ओमकार या दोन तरुणांवर तिघांनी धारदार शस्त्राने हल्ला केला आहे. यामध्ये विशाल याचा जागीच मृत्यू झाला. तर ओमकार हा गंभीर जखमी झाला असून त्याला उपचारासाठी रुग्णालयात दाखल करण्यात आले आहे. तर घटनेमुळे परिसरात खळबळ उडाली आहे. घटनेची माहिती पोलिसांना देण्यात आल्यानंतर पोलिसांनी घटनास्थळी येत तपासाला सुरवात केली आहे. 

तिघांविरुद्ध गुन्हा दाखल 

दरम्यान या हल्ल्यानंतर आरोपींनी घटनास्थळावरून पळ काढला. तर या घटनेनंतर रुग्णालयात नातेवाईकांची मोठी गर्दी जमली होती. पोलिसांनी याप्रकरणी तीन जणांविरोधात खुनाचा गुन्हा दाखल केला असून मुलीच्या प्रकरणावरून हा खून झाल्याची प्राथमिक माहिती पोलिसांनी दिली आहे. त्या अनुषंगाने पोलिसांकडून तपास सुरु आहे.