-- रश्मी पुराणिक

मुंबई : 24 ऑक्टोबरला होणाऱ्या आरोग्य विभागाच्या परिक्षेचे हॉल तिकीट उमेदवारांना मिळायला सुरवात झाली आहे. मात्र, हॉल तिकीटच्या सेंटरवरुन पुन्हा एकदा गोंधळ झाल्याचे पाहावयास मिळत आहे. एकाच दिवशी दोन परीक्षेसाठी दोन वेगळ्या जिल्ह्यात परीक्षा केंद्र आल्याने काही विद्यार्थी संभ्रमात आहेत. मागील महिण्यात होणारी आरोग्य विभागाची परीक्षा ऐनवेळी परीक्षेचे नियोजन होऊ न शकल्याने पुढे ढकलण्यात आली होती. या परीक्षेची तारीख 24 ऑक्टोबर आणि 31 ऑक्टोबर जाहीर करण्यात आली होती.

हे देखील पहा :

24 ऑक्‍टोबरला होणाऱ्या आरोग्य विभागाच्या परीक्षेचे हॉल तिकीट ऑनलाइन पद्धतीने उमेदवारांना प्राप्त होत आहेत. यातील काही हॉल तिकीट मध्ये ज्या उमेदवारांनी दोन वेगळ्या पदांच्या परीक्षेसाठी अर्ज केले आहेत, त्या उमेदवारांचे परीक्षेचे दोन पेपर एकाच दिवशी असून दोन्ही परीक्षांची केंद्रे मात्र दोन वेगळ्या जिल्ह्यात आहेत. शिवाय सकाळी असणाऱ्या एका परीक्षेचा पेपर सकाळी 10 ते दुपारी 12 तर, दुपारच्या सेशनचा दुसऱ्या पदासाठीचा पेपर दुपारी 3 ते 5 या दरम्यान आहे. त्यामध्ये उमेदवारांनी दोन पेपर देण्यासाठी मधल्या दोन ते तीन तासात दोन जिल्ह्यांमध्ये दीडशे दोनशे किलोमीटर अंतर पार करणे शक्य नसल्याने हे पेपर एकाच दिवशी कसे द्यायचे असा प्रश्न उमेदवारांना पडला आहे ?

तर, काही उमेदवारांनी अर्ज भरताना पर्याय म्हणून जवळचे जिल्ह्यातील केंद्र मिळावे असे नमूद केले असताना सुद्धा दूरच्या जिल्ह्यांमध्ये परीक्षा केंद्र मिळाले आहे. त्यामुळे लवकरात लवकर यातील अडचण दूर करून उमेदवारांना एकाच ठिकाणी ज्या ठिकाणी पर्यायी केंद्र म्हणून अर्ज भरताना निवडले गेले होते, अशा ठिकाणी केंद्र द्यावे अशी मागणी उमेदवारांनी आरोग्य विभागाकडे केली आहे.

Edited By : Krushnarav Sathe