महायुती सरकारकडून सुरू करण्यात आलेली मुख्यमंत्री लाडकी बहीण योजना अविरत सुरू आहे. या योजनेअंतर्गत लाभार्थी महिलांना दरमहा १,५०० रूपये मिळतात. जुलै महिन्याचा हप्ता देखील बँक खात्यात जमा होण्यास सुरूवात झाली आहे. पण अद्याप २,१०० रूपयांबाबत कोणतीही माहिती समोर आलेली नाही. सध्या मंत्री हसन मुश्रीफ यांनी २१,०० रूपये लवकरच खात्यात जमा होईल, अशी माहिती दिली आहे.

२१०० रूपयांच्या मुद्द्याबाबत हसन मुश्रीफ म्हणाले, 'राज्यातील लाडक्या बहिणींना १,५०० रूपये नियमित मिळतात. पण सरकारनं विधानसभा निवडणुकापूर्वी २,१०० रूपयांचे अभिवचन दिलं होतं. २,१०० रूपये बाबत दिलेलं वचन आम्ही योग्य वेळेला पूर्ण करणार आहोत', असं हसन मुश्रीफ यांनी स्पष्ट केलं.

'लवकरच स्थानिक स्वराज्य संस्थांच्या निवडणुका पार पडतील. छत्रपती शाहू महाराज काँग्रेसचे खासदार जरी असले तरी मी तुम्हाला विनंती करेन, येणाऱ्या निवडणुकांमध्ये महायुतीलाच विजयी करा. महायुतीच्या चिन्हा समोरील खटाखट बटण दाबा. मी तुम्हाला २,१०० रूपये दिल्याशिवाय राहणार नाही', असं हसन मुश्रीफ म्हणाले.

रक्षबंधनाच्या पूर्वसंध्येला लाडकी बहीण योजनेचे पैसे वितरीत

लाडक्या बहिणी जुलै महिन्याच्या हप्त्याच्या प्रतिक्षेत होत्या. मात्र, जुलै महिना जरी संपला तरी, लाडक्या बहिणींच्या खात्यात पैसे जमा झाले नव्हते. महिला व बालविकास मंत्री आदिती तटकरे यांनी रक्षाबंधनाच्या पूर्व संध्येला खात्यात पैसे जमा होणार असल्याची माहिती त्यांनी दिली. सध्या टप्प्याटप्प्यानं लाभार्थी महिलांच्या बँक खात्यात पैसे जमा होण्यास सुरूवात झाली आहे.