सांगली : अति सन्मानीय वडेट्टीवार हे ओबीसी आणि भटके विद्यार्थ्यांचा कल्याणासाठी निर्माण झालेल्या महाज्योती संस्थेला आपली जहागिर समजून मनमानी कारभार करत आहेत. महाज्योती संस्थेचा बट्ट्याबोळ आणि हसं या प्रस्थापितांच्या सरकारने करून ठेवले आहे अशी टीका गोपीचंद पडळकर Gopichand Padalkar यांनी केली आहे. ते सांगली येथील झरे गावी बोलत होते.

बड्या बड्या बाता आणि 'धोरण' खातंय लाथा अशी वडेट्टीवरांची गत झाली आहे. ओबीसी भटक्या विमुक्तांचा पुळका आल्याचे दाखवायचे आणि परत त्यांच्याच गळ्यावर सुरा फिरवायचा हे वडेट्टीवार साहेबांच धोरण राहिलेलं आहे असेही पडळकरांनी नमूद केले. gopichand padalkar on mahajyoti vijay-wadettivar decision obc students

पडळकर म्हणाले एमपीएससी आणि युपीएसएसीच्या विद्यार्थ्यांना प्रशिक्षण देण्यासाठी महाज्योतीने परिक्षा घेतली. यातील पात्र विद्यार्थ्यांना निर्वाह भत्ता देणं क्रमप्राप्त असताना महाज्योती संस्था स्पष्टपणे नकार देते. मात्र दुसरीकडे सारथी संस्था आणि बार्टी संस्था आपल्या विद्यार्थ्यांना निर्वाह भत्ता व विद्यावेतन देते. सारथी आणि बार्टीकडून विद्यार्थ्यांना प्रतिमहिना १० ते २५ हजार निधी मिळतो. महाज्योतीमात्र विद्यार्थ्यांच्या तोंडाला पानं पुसण्याच काम करीत आहे.

सारथीच्या विद्यार्थ्यांनी दिल्लीत मागच्या वर्षी आंदोलन केले तर तीन दिवसात निधी देण्याची ग्वाही मंत्री वडेट्टीवार यांनी दिली होती. आता ओबीसी विद्यार्थ्यांना निधी देण्याची वेळ आली तर वडेट्टीवार कुठल्या बिळात जाऊन बसलेत अशी जहरी टीका पडळकर यांनी केली आहे. महाज्योती संस्था ही काय ओबीसी विद्यार्थ्यांचं भलं करण्यासाठी निर्माण झाली आहे की त्यांना त्रास द्यायला? हे वडेट्टीवारांनी स्पष्ट करावे अशी मागणी पडळकरांनी करुन प्रस्थापितांच्या राज्यात ओबीसी विद्यार्थ्यांना वेगळा न्याय का असा प्रश्न उपस्थित केला आहे.

edited by : siddharth latkar