शुभम देशमुख, प्रतिनिधी...

Maharashtra Rain Update: राज्यासह देशभरात मान्सून सक्रिय झाला आहे. मुंबई आणि ठाण्यात तर पावसाने अक्षरश: धुमाकूळ घातला आहे. तसेच राज्यातील विविध भागात पावसाचा जोर वाढल्याने अनेक दुर्घटनाही समोर येत आहेत. गोंदियात नाल्यावरील रस्ता ओलंडताना पुरात वाहून ५० वर्षीय इसमाचा मृत्यू झाल्याची दुर्देवी घटना समोर आली आहे. (Gondia Rain Update)

याबाबत अधिक माहिती अशी की, गोंदिया (Gondia) जिल्यात हवामान खात्याने २६ आणि २७ जुन ला ऑरेंज अलर्ट घोषित केला आहे. गोंदिया तालुका वगळता आमगाव ,सालेकसा ,देवरी ,अर्जुनी मोरगाव ,सडक अर्जुनी ,गोरेगाव ,तिरोडा या सात तालुक्यात गेल्या २४ तासात १०७ मी मीटर पाऊसाची नोंद करण्यात आली आहे.

तर सर्वाधिक पाऊस अर्जुनी मोरगाव तालुक्यात पडला. अर्जुनी मोरगाव तालुक्यातील नदी नाले ओसंडून वाहत आहेत. यावेळी एक दुर्देवी घटना समोर आली असून पिंपळगाव गावातून जाणाऱ्या नाल्याला आलेल्या पुरात काल दुपारी ३ वाजे दरम्यान एक सायकलस्वार वाहून गेल्याची घटना घडली आहे.

या सायकल चालकाची ओळख अद्याप पटू शकली नसून तहसील प्रशासनाने तालुक्यातील गावात दवंडी देत अनोळखी इसमाचा शोध घेण्यास सुरवात केली आहे. तसेच जिल्हा आपत्ती व्यवस्थापनाने पूर ओलांडून स्वतःचा जीव धोक्यात घालत प्रवास करू नये अशा सूचना दिल्या आहेत. (Latest Marathi News)