शुभम देशमुख 
गोंदिया : सहा महिन्यांच्या विश्रांतीनंतर गडचिरोली जिल्ह्यातून हत्तीच्या कळपाची गोंदियाच्या (Gondia) मोरगाव अर्जुनी तालुक्यात एंट्री झाली आहे. रात्रीच्या वेळी हत्तीच्या कळपाने भरनोली परिसरात शेतपिकांचे नुकसान केले. त्यानंतर त्यांनी आपला मोर्चा खैरी सुकळी, बाराभाटी परिसराकडे वळविला असुन या कळपाने शेतशिवारात चांगलाच धुमाकूळ घातला. (Latest Marathi News)

गोंदिया जिल्ह्यातील मोरगाव अर्जुनी तालुक्यात आलेल्या हत्तीच्या कळपाने कवठा बोळदमार्गे कालीमाती जंगलाकडे कूच केल्याची माहिती वन विभागाला दिली- यानंतर वन विभागाने नजीकच्या गावात दवंडी देऊन सावधगिरीच्या सूचना दिल्या आहेत. २० ते २२ च्या समूहात असलेल्या रानटी (Elephants) हत्तींच्या कळपाची गडचिरोली जिल्ह्याच्या कुरखेडा मार्गे अर्जुनी मोरगाव तालुक्यात एंट्री झाली. राजोली, भरनोली, प्रतापगड, काळीमाती जंगल मार्गे बाराभाटी परिसरात दाखल झाले. ऐन धान मळणीच्या दिवसात कळप दाखल झाल्याने शेतकऱ्यांसह वन विभागाला धडकी भरली आहे. 

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

धान पोत्यांचे नुकसान 

राजोली, भरनोली येथील नीलकंठ हारामी यांच्या शेतात पाच एकरांतील धानाच्या पुजन्याची नासधूस करून हत्तींचा कळप पुन्हा गडचिरोली जिल्ह्यात परतला होता. १२ डिसेंबरला पुन्हा अर्जुनी मोरगाव तालुक्यात एंट्री केली असुन बाराभाटी येथे हत्तीच्या कळपाने पुरणलाल बेलखोडे, भोजराज बेलखोडे या शेतकऱ्यांचे पॅक हाउस व गांडूळ खत इमारतीची नासधूस केली. या इमारतीमध्ये ठेवलेल्या धानाच्या पोत्याचे नुकसान केले. तसेच गौरव बेलखोडे यांच्या शेतात असलेल्या पोल्ट्री फार्मची देखील नासधूस केली आहे.