शुभम देशमुख, ता. २३ मे २०२४

बारावी बोर्ड परीक्षेत आलेल्या अपयशानंतर १७ वर्षीय तरुणाने रेल्वेखाली उडी घेत आयुष्य संपवल्याची धक्कादायक घटना गोंदियामध्ये घडली. मोहित पटले असे या विद्यार्थ्याचे नाव आहे. या दुर्दैवी घटनेने परिसरात खळबळ उडाली आहे.

याबाबत सविस्तर माहिती अशी की, मोहित पटले (वय, १७ वर्ष) हा विद्यार्थी आमगाव शहरात आदर्श विद्यालयातील व्यावसायिक अभ्यासक्रमाचे शिक्षण होता. नुकतीच मोहितने १२ वीची परीक्षा दिली होती. दोन दिवसांपूर्वी बारावीच्या परीक्षांचा निकाल समोर आला. या निकालामध्ये तो दोन विषयात नापास झाल्याची माहिती समोर आली.

दोन विषय गेल्याचे समजताच नैराश्यातून मोहित पटले याने आमगाव रेल्वे स्टेशन परिसरातील रेल्वेच्या समोर उडी घेऊन आत्महत्या केली. मोहित हा मूळच्या आमगाव जवळील ननसरी गावातील राहणारा होता. आणि तो सैनिक भरतीची तयारी करीत होता. मात्र बारावीमध्ये दोन विषय गेल्याने त्याचे फौजी होण्याचे स्वप्न अपुर्णच राहिले.

याच नैराश्यातून मोहित पटले याने आत्महत्या केल्याचे बोलले जात आहे. याविषयी आमगाव पोलिसात गुन्हा नोंद करण्यात आला आहे. आणि पुढील तपास आमगाव पोलीस करत आहेत. दरम्यान, या दुर्दैवी घटनेने परिसरात हळहळ व्यक्त होत आहे.