कोल्हापूर जिल्हा सहकारी दूध उत्पादक संघाच्या (गोकुळ) निवडणुकीत महायुतीला मोठा धक्का बसलाय. सतेज पाटील यांच्या नेतृत्वाखालील समविचारी आघाडीने १३ जागांवर आघाडी घेत महायुतीच्या स्वप्न भंग केलाय. या निवडणुकीत महायुतीच्या प्रमुख उमेदवार शौमिका महाडिक यांच्यासह माजी अध्यक्ष अरुण डोंगळे, विश्वास पाटील आणि नाविद मुश्रीफ यांना पराभवाचा सामना करावा लागलाय.

गेल्या अनेक वर्षांपासून गोकुळ दूध संघाच्या संचालिका असलेल्या शौमिका महाडिक यांच्याकडे भाजपच्या निवडणुकीची महत्त्वाची जबाबदारी होती. त्यामुळे त्यांच्या पराभवाची चर्चा राजकीय वर्तुळात सुरू झालीय. सतेज पाटील यांच्या नेतृत्वाखालील समविचारी आघाडीने गोकुळच्या निवडणुकीत 25 पैकी 13 जागा जिंकल्या, तर महायुतीला 12 जागा मिळाल्या. शौमिका महाडिक यांच्या पराभवामुळे महाडिक कुटुंबासह भाजप आणि महायुतीला धक्का बसल्याचं मानलं जातंय.

महाडिकांचा पराभव महायुतीसाठी धक्कादायक

शौमिका महाडिक या महायुतीच्या प्रमुख उमेदवारांपैकी एक होत्या. त्या जिल्हा परिषदेच्या माजी अध्यक्षा असून विद्यमान आमदार अमल महाडिक यांच्या पत्नी आणि खासदार धनंजय महाडिक यांच्या भावजय आहेत. गोकुळच्या संचालकपदाचाही त्यांना अनुभव आहे. राजकीय आणि सहकार क्षेत्रातील अनुभव तसेच महाडिक कुटुंबाचे जिल्ह्यातील राजकीय वजन लक्षात घेता त्यांचा पराभव महायुतीसाठी धक्कादायक मानला जातोय.

एकीकडे सर्व मित्रपक्षांची एकजूट आणि दुसरीकडे प्रमुख नेत्यांचा प्रचारातील सहभाग असूनही महायुतीला अपेक्षित यश मिळालं नाहीये. गोकुळच्या निकालाने कोल्हापूरच्या सहकार क्षेत्रातील राजकीय समीकरणांना नवे वळण मिळण्याची शक्यता आहे.