‘गोकुळ’च्या पंचवार्षिक निवडणुकीतील जागावाटपावरून महायुतीत धुसफुस सुरूय. अद्याप जागावाटपाची घोषणा झाली नाहीयं. हाती आलेल्या माहितीनुसार, महायुतीचं जागावाटपाचा फॉर्म्युला ठरलाय. या जागा वाटपाला मुख्यमंत्र्यांनी हिरवा कंदीलही दाखवला आहे. तरीही हे जागा वाटप आज जाहीर होऊ शकले नाही. त्याचं कारण आहे राष्ट्रवादीचे नेते हसन मुश्रीफ यांची नाराजी. मंत्री हसन मुश्रीफ हे या जागा वाटपावर समाधानी नाहीत. यासंदर्भातील भूमिका ते दोन दिवसांत जाहीर करतील, अशी माहिती समोर आलीय.

मिळालेल्या माहितीनुसार, जागा वाटपात राष्ट्रवादीला नऊ जागा मिळाल्या तरीही त्यामध्ये आमदार राजेंद्र पाटील-यड्रावकर यांच्या गटाच्या एका जागेचा समावेश आहे. भाजप आणि शिवसेना प्रत्येकी सात आणि जनसुराज्य शक्तीसाठी दोन असे वाटप ठरलंय. मात्र मुश्रीफ यांनी पॅनलला बाहेरून पाठिंबा देण्याचा निरोप दिलाय. यावरून कोल्हापूरचं राजकारणात खळबळ उडालीय.

गेल्या सहा महिन्यांपासून चालू असलेला जागावाटपाचा तिढा कायम आहे. दरम्यान हा वाद मुख्यमंत्र्यांचा दरबारी गेल्यानंतर ठरावाच्या संख्याबळावर जागावाटपाचा फॉर्म्युलाही ठरला होता. मात्र पक्षीय पातळीवर जागावाटप झाल्यांच दिसत आहे. त्यामुळे नाराजीचा सूर उमटू लागलाय. हसन मुश्रीफांनी १० जागांची मागणी केली होती, मात्र त्यांच्या वाटाला ९ जागा आल्या आहेत. त्यामुळे नाराज असल्याचं म्हटलं जातंय.

राष्ट्रवादी आणि यड्रावकर गट यांच्याकडे अधिक ठरावधारक असतानाही कमी जागा वाट्याला आल्यामुळे मुश्रीफ नाराज आहेत. ही नाराजी मुख्यमंत्र्यांपर्यंत पोहोचलीय. त्यामुळेच जागा वाटप जाहीर होणे रखडलंय. त्यामुळे महायुतीचा फॉर्म्युला निश्‍चित झाला असला, तरीही तो रात्री उशिरापर्यंत जाहीर होऊ शकला नाहीये. गोकुळ दूध संघाच्या निवडणुकीत महायुती म्हणून राष्ट्रवादी (अजित पवार), भारतीय जनता पक्ष, शिवसेना शिंदे गट, जनसुराज्य शक्ती पक्षाने मोट बांधली आहे. या आधी झालेल्या दोन बैठकांतही जागा वाटपाचा निर्णय लांबणीवर पडला होता.