अमरावती: अमरावती येथील कथित लव्ह जिहाद प्रकरणी अमरावतीच्या खासदार नवनीत राणा यांनी पोलिसांवर काल संताप व्यक्त केला होता. तसेच भाजप (BJP) व हिंदूत्ववादी संघटना देखील आक्रमक झाल्या होत्या. मुलीचे अपहरन केले असा आरोप करण्यात आला होता, अखेर पोलिसांनी त्या मुलीचा शोध घेत ताब्यात घेतले आहे. सातारा पोलिसांनी काही तासातच रात्री १० वाजता त्या मुलीला साताऱ्यातून ताब्यात घेतले आहे.

सदर मुलगी रेल्वेने एकटी प्रवास करत होती, ती आता सुखरूप असून पुणे व सातारा पोलिसांची यात मदत घेतली अशी माहिती अमरावती पोलीस (Police) आयुक्त आरती सिंग यांनी दिली. यावेळी भाजप प्रवक्ते शिवराय कुळकर्णी यांनी पोलीस आयुक्त आरती सिंग व संपुर्ण पोलीस अधिकारी कर्मचारी यांच पुष्पगुच्छ देऊन स्वागत करत अमरावती पोलिसांचे अभिनंदन केले.

मिळालेल्या माहितीनुसार, अमरावती जिल्ह्यातील १९ वर्षेीय तरुणी २ दिवसांपासून बेपत्ता होती. अखेर तिच्या मैत्रिणीने दिलेल्या माहितीवरून ती सोहेल शहा नावाच्या युवकाच्या संपर्कात होती. मुलगी बेपत्ता झाल्याचे कळतच कुटुंबीयांनी तात्काळ पोलीस ठाण्यात तक्रार दाखल केली. पोलिसांनी सोहेल शहा याला ताब्यात घेतले. या मुलीचा तातडीने शोध घ्यावा यासाठी भाजप विश्व हिंदू परिषद आणि बजरंग दल यांच्या कार्यकर्त्यांनी पोलीस ठाण्यासमोर धरणे आंदोलन केले होते.

या प्रकरणी काल खासदार नवनीत राणा आक्रमक झाल्या होत्या. या प्रकरणावरून नवनीत राणा आणि पोलिसांमध्ये बाचाबाची झाली होती. अखेरीस राजापेठ पोलिसांनी या युवतीचा शोध लावला असून ती सातारा येथे आढळली आहे.