गणेश शिंगडे, गडचिरोली

गडचिरोली जिल्ह्यातील अहेरी पोलीस स्टेशनच्या हद्दीत घडलेल्या हत्याकांड प्रकरणाबाबत मोठी अपडेट समोर आली आहे. अहेरी पोलिसांनी केवळ दोन दिवसांतच हत्याकांडातील अज्ञात आरोपीचा शोध लावून त्याला अटक केली. नागेपल्ली येथील रविंद्र तंगडपल्लीवार यांच्या खून प्रकरणाचा फरार आरोपी समय्या मलय्या सुंकरीला पोलिसांनी ताब्यात घेतले असून, त्याने गुन्ह्याची कबुली दिली आहे. दरम्यान पोलीस पुढील तपास करत आहेत.

मिळलेल्या माहितीनुसार, रविवारी म्हणजेच १८ जानेवारी २०२६ रोजी रविंद्र तंगडपल्लीवार हे आपल्या पत्नीला प्रगती नागरी पतसंस्था, आलापल्ली येथे आरडीचे पैसे भरून येतो असे सांगून घरातून निघाले होते. संध्याकाळपर्यंत ते घरी न परतल्याने रवींद्र यांच्या पत्नीने पोस्टेला पोलीसांकडे तक्रार देऊन त्यांच्याबाबत बेपत्ता असल्याची नोंद करण्यात आली.

दुसऱ्या दिवशी म्हणजेच सोमवारी, १९ जानेवारी रोजी सकाळी सुमारे ९.३० वाजता आलापल्ली-सिरोंचा महामार्ग क्रमांक ३५३ (सी) वरील नागामाता मंदिराजवळील, जंगल परिसरात रविंद्र यांचे धारदार शस्त्राने डोके, मान आणि चेहऱ्यावर वार करून हत्या झाल्याची धक्कादायक माहिती मिळाली. यानुसार अहेरी पोलीस स्टेशनमध्ये गुन्हा दाखल करण्यात आला. यांनतर पोलिसांनी तपासाची चक्रे वेगाने फिरवली.

पोलीस अधीक्षक गडचिरोली निलोत्पल, उपविभागीय पोलीस अधिकारी अजय कोकाटे यांच्या सूचनांनुसार तयार केलेल्या विशेष पथकाने मुखबिरांच्या माहिती व तांत्रिक तपासाच्या मदतीने हा गुन्हा उघड केला. आरोपी समय्या सुंकरी याला चौकशीसाठी ताब्यात घेतल्यानंतर त्याने गुन्ह्याची कबुली दिली. दिनांक २१ जानेवारी रोजी न्यायालयात हजर केल्यानंतर पोलिसांना २८ जानेवारीपर्यंत रिमांड मंजूर झाला आहे.