महापालिका निवडणुकीदरम्यान छत्रपती संभाजीनगरमध्ये मोठा राडा झाला आहे. एमआयएमचे माजी खासदार इम्तियाज जलील यांना छत्रपती संभाजीनगरमध्ये मारहाण झाली आहे. नाराज झालेल्या कार्यकर्त्यांनी कारमध्ये बसलेल्या इम्तियाज जलील यांचा हात ओढून मारहाण केल्याचे व्हिडिओमध्ये दिसत आहे. या मारहाणीत इम्तियाज जलील यांनी भाजपचे अतुल सावे आणि शिंदे गटाचे संजय शिरसाट यांचं नाव घेत गंभीर आरोप केले आहेत.

छत्रपती संभाजीनगरमधील बायजीपुऱ्यात माजी खासदार इम्तियाज जलील यांना मारहाण झाल्याचे समोर आलं आहे. बायजीपुऱ्यात पदयात्रा काढत असताना काही कार्यकर्त्यांनी त्यांना काळे झेंडे दाखवले. त्यानंतर कारने जाताना अडवून हमरीतुमरी होऊन दोन गटात हाणामारी झाली. यावेळी जलील यांच्या कारवर हल्ला करताना पोलिसांना हस्तक्षेप करावा लागला. यावेळी पोलिसांना लाठीचार्ज देखील करावा लागला. या घटनेवर इम्तियाज जलील यांनी भाष्य करत सत्ताधारी नेत्यांवर गंभीर आरोप केलेत.

मारहाणीच्या घटनेवर भाष्य करताना जलील म्हणाले, ' त्यांच्याकडे हिरवे झेंडे नव्हते. त्यांच्याकडे काळे झेंडे आले असेल. राजकारणात असे प्रकार होतच असतात. मला त्यांच्यावर काहीच बोलायचं नाही. लोकशाहीत माझा अधिकार आहे की, कुठे जायचं, कुठे पदयात्रा काढायची. मी करत आहे. याबद्दल कुणाला आक्षेप असेल, मी येऊ नये. आमचा उमेदवार आहे. आम्ही पदयात्रा करत राहू'.

'१६ जानेवारीला निकाल आल्यावर कळेल. काळ्या आणि हिरव्या झेंड्याचा अर्थ निकालाच्या दिवशी कळेल, असेही ते म्हणाले.

'१३ आणि १४ प्रभागात आमची रॅली होती. त्याची परवानगी घेण्यात आली होती. अचानक २५ ते ३० लोक रॅलीत घुसले. त्यांनी कार्यकर्त्यांना मारायला सुरुवात केली. त्यांच्या फायटर आणि चाकू होते. एक कार्यकर्ता जखमी झाला आहे. माझी गाडी फोडण्याची त्याची तयारी होती. हे गुंड लोकसभा आणि विधानसभा निवडणुकीत अतुल सावे आणि संजय शिरसाट यांच्या सांगण्यावर खेळ करत होते. त्यांना वाटतंय की, सत्ताधारी नेत्यांच्या पाठिंब्यामुळे गुंडागर्दी करत आहे. आम्ही सर्व प्रकरण पोलिसांवर सोडत आहेत, असेही ते पुढे म्हणाले.