Datta Bharne appointed as Maharashtra’s Agriculture Minister : देवेंद्र फडणवीस यांच्या मंत्रिमंडळात थोडा फेरबदल करण्यात आला आहे. अजित पवारांच्या राष्ट्रवादी काँग्रेसचे इंदापूरचे आमदार दत्तात्रय भरणे यांना कृषिमंत्रिपदाची जबाबदारी देण्यात आली आहे. पण हे जबाबादारी स्वीकारण्याआधीच कृषिमंत्र्यांना शेतकऱ्यांच्या कर्जमाफीवर प्रश्न विचारण्यात आला. दत्ता भरणे यांना कृषिमंत्रिपदाची लॉटरी लागल्यानंतर इंदापूरमध्ये जल्लोष करण्यात आला. दत्ता भरणे यांनी प्रसारमाध्यमांशी सवांद साधत मुख्यमंत्री, उपमुख्यमंत्र्‍यांचे आभार मानले.

शेतकऱ्याची कर्जमाफी कधी होणार? When will farmers get loan waiver in Maharashtra? :

दत्ता भरणे यांना कृषिमंत्रिपद मिळताच शेतकऱ्यांच्या कर्जमाफीच्या प्रश्नाला तोंड द्यावे लागलेय. कर्जमाफीचा प्रश्न विचारताच दत्ता भरणे म्हणाले की, "अजून मी पदभार स्वीकारलेला नाही. शेतकऱ्यांच्या कर्जमाफीचा विषय आहे, त्याबाबत राज्याचे मुख्यमंत्री उपमुख्यमंत्री ही मंडळी योग्य तो निर्णय घेतील."

मुख्यमंत्री देवेंद्र फडणवीस उपमुख्यमंत्री अजित पवार उपमुख्यमंत्री एकनाथ शिंदे असतील पक्षाचे प्रदेशाध्यक्ष सुनील तटकरे असतील सर्वांनी माझ्यावरती खूप मोठी जबाबदारी दिली आहे. एका शेतकऱ्याच्या मुलाला आज कृषी खात मिळते यासारखा आनंद कुठला असू शकतो. कृषी खात्याच्या माध्यमातून राज्यातील शेतकऱ्यांना न्याय कसा मिळेल, शेतकऱ्यांच्या शेतीत नाविन्यपूर्ण शेतीचे उपक्रम कसे राबवतातील यावर माझा भविष्यात भर राहणार आहे, असे दत्तात्रय भरणे म्हणाले.

शेतकऱ्यांचा मुलगा ते कृषि मंत्री -

शेतकरी कुटुंबात जन्मलो, वाढलो आणि शेतीच्या प्रत्येक पैलूचा अनुभव घेतला आहे. म्हणूनच शेतकऱ्यांचे दु:ख, अडचणी आणि अपेक्षा मला अंतःकरणाने समजतात. आता मंत्रीपदाच्या जबाबदारीतून मला त्यांच्या न्यायासाठी, हक्कासाठी आणि प्रगतीसाठी काम करण्याची संधी मिळाली आहे. शेतकऱ्यांचा सन्मान, शाश्वत शेती आणि ग्रामीण समृद्धी हे माझे मुख्य उद्दिष्ट राहील. शासनाच्या प्रत्येक धोरणामध्ये शेतकऱ्यांचा आवाज पोहोचवण्याचा मी प्रामाणिक प्रयत्न करेन, असे दत्ता भरणे म्हणाले.