- अमर घटारे

Amravati News : मागील आठवडाभरात वातावरणामध्ये मोठ्या प्रमाणात बदल होत असून त्याचा मानवी शरीरावर परिणाम होताना दिसून येत आहे. त्यामुळे अमरावती जिल्ह्यात सध्या सर्दी, ताप आणि खोकल्याच्या रुग्णांमध्ये मोठ्या प्रमाणात वाढ झाली आहे. परिणामी जिल्ह्यातील बहुतांश रुग्णालयांमध्ये रुग्णांची गर्दी वाढू लागली आहे. (Breaking Marathi News)

अमरावती जिल्ह्यातील मुख्य शासकीय रुग्णालय असलेल्या जिल्हा सामान्य रुग्णालयात एका आठवड्यात 5000 रुग्ण सर्दी ,ताप खोकल्याचे असल्याची नोंद करण्यात आली आहे. त्यासोबतच महानगरपालिके अंतर्गत येणाऱ्या आरोग्य केंद्रावरही याच आजाराचे रुग्ण मोठ्या प्रमाणात दिसून येत आहे.

यामध्ये लहान मुलांमध्ये खोकला व तापाचे आजार वाढल्याचं दिसून येत आहे. अमरावती जिल्ह्यात डेंग्यू आजाराने मोठ्या प्रमाणात डोकं वर काढला आहे. दरम्यान नागरिकांनी अंगावर ताप न काढता तात्काळ रुग्णालयात येऊन उपचार घ्यावा असे आवाहन जिल्हा शल्य चिकित्सक दिलीप सौंदळे यांनी केले आहे.

दरम्यान कोल्हापूर जिल्ह्यातील आळते गावात देखील डेंग्यूने कहर केला आहे. डेंग्यूच्या वाढत्या प्रभावामुळे ग्रामस्थांमध्ये भीतीच वातावरण पसरले आहे. प्रशासनाचे अक्षम्य दुर्लक्ष असल्याचा आराेप ग्रामस्थ करीत आहेत.

Edited By : Siddharth Latkar