>> कैलास चौधरी

उस्मानाबाद : शेतातील विद्युत मोटार चालू करण्यास गेलेल्या शेतकरी पिता-पुत्राचा शॉक लागून मृत्यू झाल्याची घटना समोर आली आहे. तुळजापुर तालुक्यातल्या निलेगाव येथे ही हृदयद्रावक घटना घडली आहे. तातील ज्वारीच्या पिकाला पाणी देण्यासाठी हे दोघे गेले होते. शरणाप्पा जमादार व गणेश जमादार या पिता-पुत्रांची नावे आहेत.

सध्या रब्बी पिकांना पाणी देण्याचे दिवस आहेत. त्यातच विजेच्या अनियमिततेमुळे शेतकऱ्यांना सगळी कामे सोडून वीज असेल त्यावेळी शेतात पाणी देण्यासाठी जावं लागत आहे. हेच आता शेतकऱ्यांच्या जीवावर बेतत आहे. (Osmanabad News)

तुळजापुर तालुक्यातल्या निलेगाव येथील शरणाप्पा जमादार व मुलगा गणेश जमादार या पिता-पुत्राचा विजेचा शॉक लागून दुर्दैवी मृत्यु झाला आहे. जमादार यांच्या घराचे बांधकाम सुरू असल्याने लवकर मोटार सुरू करून ज्वारीच्या पिकाला पाणी सोडावे आणि बांधकामावर परत यावे या उद्देशाने हे दोघे गेले होते. मात्र आता नव्या घरात राहण्याचं पिता-पूत्राचं स्वप्नही अपूर्ण राहिलं.

यावेळी गणेश याने मोटार सुरू करण्याचा प्रयत्न केला असता गणेशला शॉक लागला. यावेळी गणेशला वाचवण्यासाठी गेलेल्या शारणाप्पा यांनाही विजेचा धक्का लागून दोघांचा जागीच मृत्यू झाला. सोमवारी काल दुपारी घडली असून नळदुर्ग पोलिस ठाण्यात घटनेची नोंद करण्यात आली आहे.