काका पुतण्याच्या नात्याला काळिमा फासणारी घटना समोर येत आहे. जुन्या कौटुंबिक वादातून पुतण्याने काकांवर कुऱ्हाडीने वार केले आहे. पुतण्याने केलेल्या हल्ल्यात काकांचा जागीच मृत्यू झाला आहे. मृत काकांनी आदल्या दिवशी पोलीस ठाण्यात पुतण्याविरोधात तक्रार दाखल केली होती. मात्र, पोलिसांनी कोणतीच कारवाई केलेली नाही. त्यानंतर दुसऱ्या दिवशी पुतण्याने काकांचा जीव घेतला. ही धक्कादायक घटना बुलढाणा जिल्ह्यातील नांदुरा तालुक्यातील सोनज या गावात घडली आहे.

शुभम विठ्ठल बोके या आरोपी पुतण्याने काकावर कुऱ्हाडीने हल्ला करत त्याची हत्या केली आहे. या हल्ल्यात गोपाळ मनोहर बोके यांचा जागीच मृत्यू झाला आहे. २८ मार्चला गोपाळ यांना पुतण्याने जुन्या वादातून मारहाण केली होती. मारहाणीनंतर काकांनी नांदुरा पोलीस ठाण्यात धाव घेतली.

नांदुरा पोलीस ठाण्यात काकांनी आपल्या पुतण्याविरोधात तक्रार दाखल केली होती. 'माझ्या जीवाला धोका आहे', असं म्हणत गोपाळ यांनी पोलिसांना सांगितलं होतं. मात्र, पोलिसांनी आरोपी पुतण्यावर कोणतीच कारवाई केलेली नाही. २९ मार्चला सकाळी आरोपी पुतण्याने पुन्हा काकाला मारहाण केली. तसेच रागाच्या भरात काकावर कुऱ्हाडीने सपासप वार केले.

या मारहाणीत गोपाळ रक्तबंबाळ झाले. त्यांचा जागीच मृत्यू झाला. या प्रकरणानंतर नातेवाईकांनी पोलिसांवरही गंभीर आरोप केले आहेत. पोलिसांनी कारवाई न केल्यामुळे गोपाळ यांची हत्या झाली असल्याचा आरोप त्यांनी केला आहे. तसेच पोलिसांनाही या प्रकरणात सहआरोपी करावे, अशी मागणी नातेवाईकांनी केली आहे.

या घटनेनंतर नातेवाईकांनी नांदुरा पोलीस ठाण्यासमोर ठिय्या आंदोलनाला सुरूवात केली आहे. पोलिसांनी तपास करीत मृतदेह शवविच्छेदनासाठी शासकीय रूग्णालयात पाठवले असून, पोलीस पुढील तपास करीत आहे. या घटनेमुळे परिसरात खळबळ उडाली आहे.