- जितेश काेळी

Dapoli News : दापोली नगरपंचायतीतील महाविकास आघाडीतील (mva) राष्ट्रवादीचे नगरसेवक अन्वर रखांगे यांचा मूलगा फैजान याला रत्नागिरी (ratnagiri) जिल्हा आर्थिक गुन्हा अन्वेषण शाखेकडून अटक करण्यात आली आहे. या अटकेमुळे रत्नागिरी जिल्ह्यात मोठी खळबळ उडाली आहे. (Maharashtra News)

दापोली नगरपंचायतीचे निलंबित कर्मचारी लेखापाल दीपक सावंत याने नगरपंचायतीमध्ये कोट्यावधी रुपयांचा आर्थिक भ्रष्टाचार केल्याचा आरोप त्यांच्यावर ठेवण्यात आला आहे. त्यांनाही यापूर्वीच पोलिसांडकूडन अटक करण्यात आली होती. तो सध्या जामीनावरती मुक्त आहे.

आता याच कोट्यावधी रुपयांच्या भ्रष्टाचार प्रकरणात एका राष्ट्रवादीच्या नगरसेवकाच्या सुपुत्राचाच नंबर लागल्याने आता पुढचा नंबर कोणाचा याची चर्चा जिल्ह्यात सध्या सुरू आहे. दापोली नगरपंचायतीत कोट्यावधी रुपयांचा भ्रष्टाचार प्रकरणाचा तपास जिल्हा आर्थिक गुन्हा अन्वेषण शाखेकडे सोपवण्यात आला आहे.

याच प्रकरणात फैजान रखांगे यांच्या खात्यावरती दीपक सावंत यांनी जवळपास तब्बल सुमारे दीड कोटी रुपयांपेक्षा अधीक रक्कम वर्ग केल्याची माहिती पोलीस तपासात समोर आल्याने मोठी खळबळ उडाली आहे.

आर्थिक गुन्हा अन्वेषण शाखेचे पथक फैजान रखांगे यांच्या अटकेसाठी वॉच ठेऊन होते. मात्र फैजान रखांगे गेले काही दिवस भारता बाहेर गेल्याची चर्चा होती. मात्र फैजान दापोलीत येताच त्याला गुन्हा अन्वेषण शाखेच्या पोलीस पथकाकडून दापोली येथून अटक करण्यात आली आहे.

Edited By : Siddharth Latkar