मुंबई - पर्यावरण मंत्री आदित्य ठाकरे (Aditya Thackeray) आज अयोध्या दौऱ्यावर आहेत. आदित्य ठाकरे यांच्या स्वागतासाठी शिवसेनेकडून (Shivsena) जय्यत तयारी करण्यात आली आहे. आज सकाळी 11 वाजण्याच्या सुमारास आदित्य ठाकरे हे लखनऊ विमानतळावर दाखल होणार आहेत. (Aditya Thackeray Ayodhya Visit)

आदित्य ठाकरे यांच्या अयोध्या दौऱ्यासाठी महाराष्ट्रातून १० ते १२ हजार शिवसैनिक अयोध्येत दाखल झाले आहेत. शहरात ठिकठिकाणी आदित्य ठाकरेंच्या दौऱ्याचे पोस्टर्स आणि भगवे झेंडे लावण्यात आले आहे. शरयू तीरावर शिवसैनिकांचे जत्थे जमायला सुरुवात झाली आहे. आदित्य ठाकरे यांच्या हस्ते होणाऱ्या महाआरतीची तयारी जवळपास पूर्ण झाली आहे.

हे देखील पाहा -

दरम्यान, दोन दिवसांपूर्वीच शिवसेना नेते खासदार संजय राऊत यांच्यासह काही नेते आणि पदाधिकारी अयोध्येत दाखल झाले आहेत. स्थानिक शिवसेना नेत्यांकडून आदित्य यांच्या दौऱ्याची तयारी केली जात आहे. हा दौरा राजकीय नसून श्रद्धेचा असल्याचे त्यांनी याआधी म्हटले होते. याआधी आदित्य ठाकरे यांचा अयोध्या दौरा10 जूनला निश्चित करण्यात आला होता. पण राज्यसभा निवडणुकीच्या पार्श्वभूमीवर अयोध्या दौऱ्याची तारीख बदलून 15 जून करण्यात आली.

असा असणार आदित्य ठाकरे यांचा संपूर्ण दौरा

- सकाळी 11 वाजता लखनऊ विमानतळावर आगमन

-दुपारी 1.30 वाजता- अयोध्येत आगमन त्यानंतर इस्कॉन मंदिराला भेट

-दुपारी 2.30 ते 3.30 वाजण्याच्या दरम्यान पत्रकार परिषद

-दुपारी 4.30 वाजता- हनुमान गढी येथे दर्शन घेणार

- संध्याकाळी 5 वाजता- प्रभू श्री रामाचं दर्शन घेणार

-संध्याकाळी 6 वाजता- लक्ष्मण किल्ला येथे भेट देणार

-संध्याकाळी 6.45 वाजता- शरयू नदीच्या घाटावर आरती करणार

-संध्याकाळी 7.30 वाजता- लखनऊला प्रस्थान