सागर गायकवाड

नाशिक : तुम्ही जर इलेक्ट्रिक बाईक वापरात असाल तर सावधान ! नाशिकच्या इंदिरानगर परिसरात असलेल्या पांडवनगरी येथील ऐश्वर्या रेसिडेन्सी या इमारतीमध्ये इलेक्ट्रिक बाईकला अचानक आग लागून संपूर्ण बाईक जळून खाक झाल्याची घटना घडली आहे. या घटनेत कुठल्याही प्रकारची जीवित हानी झाली नसली तरी या बाईकचे मोठे नुकसान झाले आहे. Electric Bike Burnt In Nashik

हे देखील पहा -

ऐश्वर्या रेसिडेन्सी मध्ये राहणाऱ्या या बाईकच्या मालकाने आपली इलेक्ट्रिक बाईक इमारतीच्या पार्किंगमध्ये चार्जिंगला लावली होती. चार्जिंगला लावल्यानंतर गाडीची बॅटरी ओवरहीट झाल्याने अचानक त्या बाईकला आग लागली. आग एवढी भयानक होती की या आगीच्या ज्वाळा परिसरात लांबून दिसत होत्या. परिसरातील नागरिकांना ही आग दिसल्यानंतर त्यांनी वाळू आणि माती च्या साह्याने आग विझविण्याचा प्रयत्न केला. मात्र, तब्बल एक ते दीड तासाने ही आग विझली या आगीमुळे या इमारतीतील मीटर आणि वायरिंग पूर्णपणे जळून खाक झाली आहे

इलेक्ट्रिक बाईक किंवा इलेक्ट्रिक कार यांना आरटीओकडून तपासणी झाल्यानंतरच त्यांना बाजारात विक्रीस परवानगी दिली जाते..त्यामुळे घाबरण्याचे कारण नाही. मात्र ओव्हर चार्जिंग किंवा चार्जर हे त्याच कंपनीचे न वापरता दुसऱ्या कंपनीचे वापरल्यामुळे देखील बाईक किंवा कारची बॅटरी ओव्हरहीट होऊ शकते आणि यात असाच प्रकार घडला असावा असं तज्ज्ञांचं मत आहे.

पेट्रोलचे आणि डिझेलचे भाव गगनाला भिडत असताना नागरिक हे इलेक्ट्रिक गाडीच्या बाजूने वळत आहेत. त्यामुळे इलेक्ट्रिक गाडीची मागणी वाढली आहे. पण गाडी घेतल्यानंतर ती कशा पद्धतीने वापरावे याचे ज्ञान असणेही महत्त्वाचे आहे. त्यामुळे कुठलीही इलेक्ट्रिक गाडी घेताना त्यासंबंधी पूर्ण माहिती घेऊन खरेदी करावी.

Edited By : Krushnarav Sathe