>> तरबेज शेख

नाशिक: नाशिकमधून एक धक्कादायक बातमी समोर आली आहे. सावकाराच्या जाचाला कंटाळून दोन भावांनी विष प्राशन केलं आहे. यात एकाचा मृत्यू झाला आहे तर एकाची प्रकृती गंभीर असून त्याच्यावर उपचार सुरु आहेत.

नाशकात सावकारीचं जाळं मोठं असल्याचं या घटनेतून उघड झालं आहे. सावकाराच्या कर्जामुळे नागरिक आत्महत्या करत आहेत. दोन भावांना विष प्राशन केलं आहे. आत्महत्या करणाऱ्या या भावांकडे एक सुसाईड नोट सापडली आहे.

सावकाराने पैशासाठी तगादा लावल्याने कंटाळून विषप्राशन केल्याचं या सुसाईड नोटमध्ये म्हटलं आहे. पैसे वसुलीसाठी सावकाराने दोघा भावांना बेदम मारहाण केली होती. मात्र या घटनेनंतर आता नातेवाईक आक्रमक झाले आहेत. पोलीस ठाण्यात याबाबत अद्याप गुन्हा दाखल झालेला नाही. (Nashik News)

नातेवाईकांनी हॉस्पिटलमध्ये हैदोस घालत मृतदेह घेण्यास नकार दिला. तसेच नाशिक-पुणे रोडवर रास्ता रोको देखील त्यांनी केला. त्यामुळे वाहतूक विस्कळीत झाली होती. जोपर्यंत आरोपींवर कारवाई होत नाही तोपर्यंत मृतदेह ताब्यात घेणार नाही असा पवित्रा नातेवाईकांनी घेतला आहे.

काही दिवसांपूर्वी सावकारीच्या कर्जबाजारीपणामुळे सातपूरमध्ये देखील बाप-लेकाने आत्महत्या केली होती. त्यामुळे नाशिक पोलीस सावकारांना आटोक्यात आणण्याचा प्रयत्न करणार का? असा सवाल नागरिकांनी उपस्थित केला आहे.