Rajratna Ambedkar on Dr Babasaheb Ambedkar : बाबासाहेब आंबेडकर (DR Babasaheb Ambedkar) यांचा केवळ राजकारणासाठी उपयोग केला जातोय. बाबासाहेबांचे पुतळे उभारून काही होणार नाही. संविधान वाचवण्याची गरज आहे, असं मत बाबासाहेब आंबेडकरांचे पणतू राजरत्न आंबेडकर यांनी व्यक्त केलं आहे. सांगली जिल्ह्यातील जत येथे झालेल्या एका कार्यक्रमात ते असं म्हणाले आहेत.

आता सरकारनं इंदू मिलच्या जागी डॉ. बाबसाहेब आंबेडकर यांचं स्मारक उभं करू नये. ती जागा समाजाच्या नावे करावी. सहा महिन्यात आम्ही स्मारक उभारू, असंही ते म्हणाले आहेत.

राजरत्न आंबेडकर म्हणाले आहेत की,''फक्त बाबासाहेबांच्या पुतळ्याचे अनावरण करू नका, बाबासाहेबांचा एक विचार पूण करण्याचं काम आपल्या डोक्यामध्ये निर्माण करा. मग ते शैक्षणिक, राजकीय, आर्थिक आणि सामाजिक असेल. हा विचार या जतमध्ये दिसला पाहिजे.'' (Latest Political News)

ते म्हणाले की, ''मला कधीकधी आश्चर्य वाटतं की, ज्या महामानवाने आपलं संपूर्ण आयुष्य जातीच्या अंताची लढाई करण्यासाठी घालवलं. जातीच्या व्यवस्थेच्या विरोधात बाबसाहेब उभे राहिले. जात नष्ट झाली पाहिजे यासाठी ते आयुष्यभर लढले. त्याच नेत्याला आपण जातीचा नेता करून ठेवलं आहे.''