अभिजित देशमुख, साम टीव्ही

Dombivli Crime News : डोंबिवली शहरातून एक धक्कादायक समोर आली आहे. शिवसेनेच्या महिला कार्यकर्त्या आणि तिच्या मुलाला एका बिल्डरने बेदम मारहाण केली आहे. इतक्यावर हा बिल्डर थांबला नाही, तर त्याने या महिला कार्यकर्त्याच्या गाडीची सुद्धा तोडफोड केली. याप्रकरणी विष्णूनगर पोलिसांनी गुन्हा दाखल केला असून घटनेचा तपास सुरू केला आहे. (Latest Marathi News)

बाळू भोईर आणि त्याचा मुलगा अनिकेत भोईर, असं गुन्हा (Crime News) दाखल केलेल्या संशयित आरोपींचं नाव आहे. मिळालेल्या माहितीनुसार, पीडित महिलेने डोंबिवली पश्चिमेकडील एका इमारतीमध्ये घर घेतलं होतं. मात्र हे घर व इमारत अनधिकृत असल्याचं महिलेला कळालं.

माहिती मिळताच महिलेने पैसे परत देण्याचा तगादा बिल्डरकडे लावला. दोन दिवसांपूर्वी या महिलेने विकत घेतलेल्या फ्लॅटवर बिल्डरने आपल्या मुलाची नेमप्लेट लावली होती. पीडित महिलेने याचा जाब बिल्डरला विचारला. त्यामुळे संतापलेल्या बिल्डर व त्याच्या मुलाने पीडित महिलेला मारहाण केली इतकेच नव्हे तर तिच्या गाडीची तोडफोड केली.

यावेळी आईला वाचवण्यास आलेल्या त्याच्या मुलाला देखील बिल्डर व त्याच्या साथीदाराने मारहाण केली .या प्रकरणी विष्णूनगर पोलीस (Police) ठाण्यात बाळू भोईर व त्याचा मुलगा अनिकेत भोईर यांच्याविरोधात गुन्हा दाखल करण्यात आलाय विष्णू नगर पोलिसांनी पुढील तपास सुरू केला आहे.

Edited By - Satish Daud