अभिजीत देशमुख

डोंबिवली : घराजवळ असलेल्या विजेच्या खांबाचा शॉक लागून (Electric Shock) एका इसमाचा मृत्यू झाल्याची धक्कादायक घटना डोंबिवली (Dombivili) कोपर रोड सिद्धार्थनगर परिसरात मंगळवारी रात्रीच्या सुमारास घडली. मांगीलाल मोरे असं मयत इसमाचे नाव आहे. (Maharashtra News)

डोंबिवली पश्चिमेकडील कोपर रोड सिद्धार्थनगर परिसरात मांगीलाल मोरे हे आपल्या कुटुंबासह राहतात. मांगीलाल हे मिळेल ते काम करून कुटुंबाचा उदरनिर्वाह करत होते. दरम्‍यान मंगळवारी (१३ जून) रात्रीच्या सुमारास ते आपल्या घरात जात असताना घराशेजारी असलेल्या विजेच्या खांब्याचा शॉक लागून त्याचा मृत्यू झाला. सिद्धार्थनगर परिसरात अनेक ठिकाणी विजेच्या खांब्यावरून विजेच्या वाहिन्या लोंबकळत आहेत. याबाबत स्थानिक नागरिकांनी अनेकदा तक्रारी केल्या होत्या. मात्र महावितरण दुर्लक्ष केल्याचा आरोप यावेळी स्थानिक नागरिकांनी केला.

नागरीकांचा रास्‍ता रोको

मांगीलाल मोरे यांच्या मृत्यूनंतर परिसरात एकच संतापाची लाट पसरली. आज दुपारच्या सुमारास सिद्धार्थनगरमधील नागरिकांनी रस्ता रोको करत (Mahavitaran) महावितरण व महापालिकेच्या या कारभाराचा निषेध नोंदवला. मांगीलाल मोरे यांच्या कुटुंबीयांना नुकसान भरपाई देण्यात यावी. तसेच दोषी अधिकाऱ्यांवर कारवाई करावी; अशी मागणी यावेळी मोर्चाकऱ्यानी केली. याबाबत महावितरण व कल्याण डोंबिवली महानगरपालिकेच्या अधिकाऱ्यांनी घटनास्थळी येत पाहणी केली. याबाबत बोलताना महावितरणचे अधिकारी इमरान शेख यांनी विद्युत निरीक्षकाचा अहवाल आल्यानंतर दोशींवर कारवाई तसेच नुकसान भरपाई याबाबत कार्यवाही करण्यात येईल असे सांगितले.