कोल्हापूर : ताराबाई पार्क येथे एक धक्कादायक घटना उघडकीस आली आहे. पेशाने डॉक्टर असलेल्या एका तरुणीनं इंजेक्शनचा ओव्हरडोस (injection overdose) घेऊन आत्महत्या केली आहे. ताराबाई पार्कमधील एका मॉल जवळ या तरुणीचा मृतदेह आढळून आला आहे. अपूर्वा प्रविणचंद्र हेंद्रे (३०) असं मृत महिलेचं नाव आहे. या घटनेची कोल्हापूरच्या शाहपुरी पोलीस स्टेशनमध्ये नोंद करण्यात आली आहे. महिला डॉक्टरच्या आत्महत्येच्या (doctor end life) घटनेमुळं परिसरात एकच खळबळ उडाली आहे.

मिळालेल्या माहितीनुसार, अपूर्वा हेंद्रे कसबा बावडा येथील एका हॉस्पिटलमध्ये नोकरी करत होती. अपूर्वा शनिवारी तिच्या मित्र मैत्रिणींसोबत पार्टी करण्यासाठी गेली होती. त्यानंतर मध्यारात्री पार्टी संपल्यानंतर त्या घरी परतल्या. पण त्यानंतर कुटुंबीयांना न सांगताच अपूर्वा घराबाहेर पडली.

त्यानंतर अपूर्वाच्या कुटुंबीयांनी तिची शोधाशोध केली पण त्यांना अपूर्वा सापडली नाही. त्यानंतर त्यांनी शहापुरी पोलीस स्टेशनला जाऊन अपूर्वा बेपत्ता झाल्याची माहिती दिली. त्यानंतर पोलिसांनी आणि तिच्या कुटुंबातील सदस्यांनी अपूर्वाचा शोध सुरु केला. त्यावेळी घराजवळच असणाऱ्या मॉल शेजारी अपूर्वा बेशुद्ध अवस्थेत सापडली. त्यानंतर अपूर्वाला रुग्णालयात नेण्यात आले पण उपचारापूर्वीच डॉक्टरांनी अपूर्वाला मृत घोषीत केले.

Edited By - Naresh Shende