लातूर : लातूर जिल्ह्याच्या अहमदपूर येथील लिंगायत धर्मगुरू राष्ट्रसंत डॉ.शिवलिंग शिवाचार्य महाराज यांच्या मृत्यूच्या एक वर्षानंतरही प्रॉपर्टी आणि समाधी स्थळावरून वाद निर्माण झाला आहे. मठाची प्रॉपर्टी आणि समाधी स्थळाची पेटी हलवून महाराजांचे काही नातेवाईक आणि कार्यकारणीतले काही जण दुकानदारी सुरु करीत असल्याचा आरोप शिवा लिंगायत युवक संघटनेने केला आहे.

हे देखील पहा -

त्यामुळे समाधी स्थळावर पोलीस पहारा आणि सीसीटीव्ही कॅमेरे बसवण्याची मागणी संघटनेकडून करण्यात येत आहे. तसेच डॉ.शिवलिंग शिवाचार्य महाराजांच्या शेवटच्या सहा महिन्यांच्या जीवन प्रवासाची सीआयडी चौकशी करण्याची मागणी ही संघटनेने केली आहे. या मागणीसाठी लातूरच्या महात्मा गांधी चौकात एक दिवसाचे लाक्षणिक उपोषण करण्यात आले.

शासकीय इतमामात महाराजांवर अंत्यसंस्कार झाल्यानंतर अशा पद्धतीने समाधीसाठी दुकानदारी करण्याचा प्रयत्न लिंगायत समाज हाणून पाडेल असा इशाराही यावेळी देण्यात आला. गेल्यावर्षी राष्ट्रसंत डॉ.शिवलिंग शिवाचार्य महाराजांच्या मृत्यूपूर्वी लातूर आणि नांदेडच्या जिल्हाधिकारी यांनी इन कॅमेरा केलेली व्हिडिओ सीडी सार्वत्रिक करावी. जेणेकरून महाराजांचा उत्तराधिकारी कोण आहे हे ही सर्वांसमोर येईल असेही मत यावेळी आंदोलकांनी नोंदविले आहे.

Edited By : Krushnarav Sathe