धुळे : पाच टक्के व्याजाने दिलेली रक्कम व्याजासकट वसूल केली. तरीदेखील संबंधितांची शेत जमीन आपल्या नावावर करून घेतली. या विरोधात दिलेल्या तक्रारीवरून धुळे आर्थिक गुन्हे शाखेच्या पथकाने अवैध सावकारी करणाऱ्या सावकाराला ताब्यात घेतले आहे. त्या विरोधामध्ये अवैध सावकारी करत तक्रारदाराची जमीन लाटण्याचा गुन्हा दाखल करण्यात आला आहे. 

शिरपूर (Shirpur) येथील सावकाराने तक्रारदाराला २०१७ मध्ये तीस लाख रुपये पाच टक्के व्याजदराने दिले होते. आतापर्यंत या अवैध सावकाराने संबंधिताकडून जवळपास एक कोटी ३७ लाख रुपये देखील वसूल केले आहेत. तरी देखील वाढलेल्या व्याजाच्या पोटी अवैध सावकाराने संबंधिताची जमीन देखील आपल्या नावे करून घेतल्याची तक्रार दाखल झालेली होती. याबाबत आता आर्थिक गुन्हे शाखेच्या वतीने (Dhule LCB) पुढील तपास करण्यात येत आहे. आर्थिक गुन्हे शाखेच्या वतीने करण्यात आलेल्या अवैध सावकारी विरोधात कारवाईनंतर अवैध सावकारांचे धाबे चांगलेच दणाणले आहेत.

याशिवाय आणखी तीन जणांनी देखील या संबंधित सावकारा विरोधामध्ये तक्रार दाखल केली असून या चार तक्रारींचा विचार करता आर्थिक गुन्हे शाखेच्या वतीने या अवैध सावकारावर कारवाई करण्यात आली आहे. याबाबत या सावकाराविरोधात गुन्हा दाखल झाल्यानंतर पोलिसांनी (Police) त्याला ताब्यात घेतले आहे. त्याला न्यायालयात नेले असता न्यायालयाने या सावकाराला दोन दिवसांची पोलीस कोठडी देखील सुनावली आहे.