शिरपूर (धुळे) : वाघाडी (ता. शिरपूर) येथील रहिवासी तथा भारतीय सैन्य दलाचे लान्सनायक मनोज संजय माळी (वय २५) यांना सिक्कीम येथे कर्तव्य (Soldier Death) बजावत वीरमरण आले. (Shirpur News) बुधवारी (५ जुलै) सायंकाळी त्‍यांचा अपघात होवून वीरमरण प्राप्त झाले. (Maharashtra News)

सिक्कीम येथे डोंगराळ भागात कर्तव्य बजावत असताना पाय घसरुन मनोज माळी सुमारे पाचशे फूट खोल दरीत कोसळले असल्याची प्राथमिक माहिती आहे. त्यांचा मृतदेह बाहेर काढण्याचे काम तातडीने सुरु करण्यात आले. तेथून मृतदेह वाघाडी येथे आणला जाणार असून सैन्यदलासह शासकीय इतमामाम त्यांच्यावर अंत्यसंस्कार करण्यात येणार आहेत.

चार वर्षापुर्वी सैन्‍यदलात भरती

चार वर्षापूर्वी मनोज माळी हे सैन्यदलात सेवेसाठी रुजू झाले होते. त्यापूर्वी येथील एसपीडीएम महाविद्यालयात राष्ट्रीय छात्रसेनेचे सिनिअरअंडर ऑफिसर म्हणून त्यांनी काम पाहिले होते. अत्यंत सामान्य कुटुंबातील मनोज माळी यांनी बालपणापासून सैन्यदलात नोकरीचे स्वप्न पाहिले होते. त्यांच्या मृत्यूचे वृत्त कळताच परिसरातील लोकप्रतिनिधी, पदाधिकाऱ्यांनी वाघाडी येथील संजय माळी यांच्या घरी जाऊन सांत्वन केले. मनोज माळी यांच्यामागे वडील, भाऊ आणि आई असे कुटुंब आहे.