शिरपूर (धुळे) : दुचाकी चोरीवरच समाधान न मानता थेट ओएलएक्स या ई-कॉमर्स प्लॅटफॉर्मवर तिची विक्री (Shirpur) करण्याचा प्रयत्न करणाऱ्या युवकाला शहर पोलिसांनी (Police) अटक केली. त्याच्याकडून आणखी काही दुचाकी चोरीचे गुन्हे उघडकीस येण्याची शक्यता आहे. (Breaking Marathi News)

वर्शी (ता. शिंदखेडा) येथील सखाराम शेनपडू भोई (वय ५२) २७ जूनला कामानिमित्त शिरपूरला आले होते. बसस्थानकासमोर असलेल्या टॅक्सी स्टँड परिसरात गौरव हॉस्पिटलसमोर त्यांनी दुचाकी लावली. अज्ञात संशयिताने तेथून दुचाकी चोरून नेली. भोई यांच्या फिर्यादीवरून शहर पोलिस ठाण्यात चोरट्यावर गुन्हा दाखल करण्यात आला.

दरम्यान, पोलिसांना संबंधित चोरीची दुचाकी ओएलएक्स या ई-कॉमर्स प्लॅटफॉर्मवर विक्रीसाठी उपलब्ध असल्याची माहिती मिळाली. त्यांना संशयिताचा सुगावा लावला. त्याच्यावर पाळत ठेवली. सोमवारी संशयित दुचाकीची नंबरप्लेट काढून फिरत असताना चोपडा फाटा येथे त्याला ताब्यात घेतले. चेसीस व इंजिन क्रमांकावरून दुचाकी चोरीची असल्याचे निष्पन्न होताच त्याला वाहनासह शहर पोलिस ठाण्यात नेण्यात आले. रूपेश युवराज बंजारा (वय १९, रा. अजनाड, ता. शिरपूर) असे संशयिताचे नाव आहे.