धुळे : राष्ट्रवादी काँग्रेस पक्षाचे सर्वेसर्वा शरद पवार (Sharad Pawar) यांनी राष्‍ट्रीय अध्‍यक्षपदाचा राजीनामा देत निवृत्‍तीची घोषणा केली. या घोषणेनंतर (Dhule) धुळ्यात राष्ट्रवादी काँग्रेसच्या पदाधिकारी व कार्यकर्त्यांनी आंदोलन करत राजीनामा मागे घेण्याची मागणी केली आहे. (Latest Marathi News)

राष्ट्रवादी काँग्रेस पक्षाचे (NCP) सर्वेसर्वा शरद पवार यांनी निवृत्तीची घोषणा केल्यानंतर राज्यभरात या घोषणेचे पडसाद उमटताना दिसून येत आहेत. अनेक जिल्‍ह्यातील पदाधिकारींनी देखील आपल्‍या पदाचा राजीनामा दिला आहे. तसेच शरद पवार यांनी राजीनामा मागे घेवून पक्षाचे अध्‍यक्ष राहून नेतृत्‍व करावे, अशी मागणी होत आहे.

राज्यभरात राष्ट्रवादी काँग्रेस पक्षाच्या पदाधिकारी व कार्यकर्त्यांतर्फे शरद पवार यांनी केलेली घोषणा मागे घेण्यात यावी अशी मागणी करण्यात येत आहे. धुळ्यात देखील राष्ट्रवादी काँग्रेस पक्षाच्या पदाधिकारी व कार्यकर्त्यांनी धुळे शहरातील गांधी पुतळ्याजवळ अनोख्या पद्धतीने आंदोलन करून राष्ट्रवादी काँग्रेस पक्षाचे सर्वेसर्वा शरद पवार यांनी केलेली निवृत्तीची घोषणा मागे घेण्यात यावी अशी मागणी केली आहे.