धुळे : साक्री येथील चिपलीपाडा येथे मेणबत्तीच्या कारखान्यात झालेल्या स्फोटात (Dhule News) आणखी एक महिलेचा उपचारा दरम्यान मृत्यू झाला आहे. या घटनेत घटनास्थळी ४ महिलांचा जागीच मृत्यू झाला होता. परंतु उपचारासाठी रुग्णालयात (Hospital) दाखल असलेल्या आणखी एका महिलेचा मृत्यू झाल्याने खळबळ उडाली आहे. (Maharashtra News)

चिपलीपाडा येथे मेणबत्ती बनविण्याचा कारखाना होता. यात मंगळवारी दुपारच्‍यावेळी अचानक स्‍फोट होवून काम करत असलेल्‍या चार महिलांचा जागीच मृत्‍यू झाला होता. तर उपचारादरम्‍यान महिलेचा मृत्‍यू झाल्‍याने मृतांची संख्या आता ५ झाली आहे. मृतांमध्ये 15 वर्षीय बलिकेचा देखील समावेश आहे. अद्याप आणखी एका महिलेवर नंदुरबार येथील शासकीय रुग्णालयात उपचार सुरू आहेत.

फटाके देखील बनविले जात होते

विशेष म्हणजे मेणबत्तीच्या नावाने फटाके बनवण्याचा देखील कारखाना सुरू होता. पोलिसांनी या प्रकरणी एकास ताब्यात घेतले आहे. याबाबत जिल्हाधिकाऱ्यांनी घटनास्थळी जाऊन पाहणी केली व जिल्हाधिकाऱ्यांनी मुख्यमंत्र्यांतर्फे मृतांना ५ लाख रुपयांची मदत जाहीर केली आहे. तसेच दोषींवर कठोरात कठोर कारवाई करण्याचे देखील मृतांच्या कुटुंबियांना आश्वासन दिले आहे.