धुळे : धुळे तालुक्यातील कापडणे शिवारात रात्रीच्या सुमारास मुसळधार व अति मुसळधार पाऊस झाला. या पावसामुळे नाल्यांना  होता. दरम्यान अचानक नाल्याचे पाणी गोठ्यात शिरल्याने यामध्ये शेतकऱ्याच्या पशुधनाचे मोठ्या प्रमाणात नुकसान झाले आहे. 

दिवसभर कडक उन्हाचे चटके व उष्णतेच्या झळा जाणवल्यानंतर सायंकाळच्या सुमारास अचानक आकाशात ढगांनी गर्दी केली होती. यानंतर काही वेळाने पावसाला सुरवात झाली. तर रात्रीच्या सुमारास जोरदार पावसाने हजेरी लावली. यात धुळे (Dhule) तालुक्यातील कापडणे शिवारात मुसळधार ते अतिमुसळधार पाऊस झाला. रात्री झालेल्या मुसळधार पावसामुळे नाल्यांना पाणी आले होते. (Heavy Rain) नाल्याचे पाणी गोठ्यात शिरल्याने कापडणे शिवारातील पशुधनाचे मोठ्या प्रमाणात नुकसान झाले आहे.  

मध्यरात्रीच्या सुमारास नाल्याचे पाणी गोठ्यात शिरले. त्यावेळी पाऊस सुरू असल्यामुळे वीजपुरवठा खंडित झाला होता. मोठ्या प्रमाणात पाणी गोठ्यात शिरल्यामुळे जवळपास सात गुरे त्याचबरोबर दहाहून अधिक कोंबड्या व तीन ते चार बोकड मृत्युमुखी पडले आहेत. यामध्ये शेतकऱ्याचे मोठ्या प्रमाणात नुकसान झाले असून प्रशासनाने याची दखल घ्यावी. लवकरात लवकर नुकसान भरपाई मिळवून द्यावी अशी मागणी नुकसानग्रस्त शेतकऱ्यातर्फे करण्यात येत आहे.