धुळे : बनावट नोटा चलनात आणणाऱ्यांची टोळी सक्रिय झाली आहे. अशाच प्रकारे शिरपूर पोलिसांनी बनावट नोटांसह तिघा जणांच्या मुसक्या आवळल्या आहेत. त्यांच्याकडून तब्बल ४ लाख ११ हजार पाचशे रुपयांच्या नोटा जप्त केल्या आहेत. या प्रकरणी अधिक चौकशी सुरु असून पोलिसांचे एक पथक गुजरातकडे रवाना झाले आहे.  

बनावट नोटा चलनात आणणारे सक्रिय झाले आहेत. प्रामुख्याने पाचशे रुपयांच्या बनावट नोटा पाहण्यास मिळत आहेत. दरम्यान शिरपूर पोलिसांचे पथक पेट्रोलिंग करत असताना या दरम्यान एका दुचाकीवर तीन जण संशयास्पद रित्या आढळून आले. पोलिसांनी त्यांना थांबवत त्यांना विचारणा केली असता त्यांच्याकडून संशयास्पद उत्तर मिळाल्यानंतर पोलिसांनी त्यांना ताब्यात घेत तपासणी केली. यात त्यांच्याजवळ बनावट नोटा आढळून आल्या. 

चार लाखाहून अधिकच्या बनावट नोटा जप्त 

पोलिसांनी या तिघांची अंगझडती घेतली असता त्यांच्याकडे असलेल्या बॅगेमध्ये पाचशे रुपयांच्या ८२३ नोटा पोलिसांना आढळून आल्या आहेत. पोलिसांनी त्या नोटांची बारकाईने तपासणी केली असता या सर्व नोटा बनावट असल्याचे पोलिसांच्या तपासा दरम्यान उघडकीस आले आहे. यासंदर्भात तिघा जणांना पोलिसांनी ताब्यात घेतले असून त्यांच्याकडे असलेले जवळपास ५०० रुपयांच्या चार लाख ११ हजार पाचशे रुपयांच्या नोटा पोलिसांनी हस्तगत केल्या. 

पोलिसांचे पथक गुजरातला रवाना 

या कारवाईदरम्यान शिरपूर पोलिसांनी जवळपास ५ लाख ४६ हजार ५०० रुपयांचा मुद्देमाल हस्तगत केला आहे. या सर्व बनावट नोटा गुजरात येथील असल्याचे प्राथमिक तपासात उघड झाले असून यासंदर्भात अधिक तपास करण्यासाठी पोलिसांचे तीन पथक गुजरातकडे रवाना करण्यात आले आहेत. या प्रकरणी पुढील तपास शिरपूर पोलीस करीत आहेत.